Մենք ընտրություններին մասնակցում ենք 50 տոկոսից ավել ձայներ ստանալու ոգով և ուզում ենք, որ քաղաքացիներն ամբողջությամբ քաղաքի ղեկը վստահեն մեզ, որպեսզի կարողանանք մեր շուրջը համախմբել մնացած բոլորին, քանզի մենք կառավարում ենք, հարաբերվում ենք առանց ատելության, առանց թշնամանքի, առանց վիրավորանքի և առանց նվաստացման: Այս մասին, այսօր քարոզարշավի ամփոփիչ հանդիպմանը լրագրողների հետ զրույցում ասաց «Հանրապետություն» կուսակցության Երևանի քաղաքապետի թեկնածու Արտակ Զեյնալյանը:
Լրագրողի այն հարցին, թե ինչպես կգնահատի իրավապաշտպան Ռուբեն Մելիքյանի հայտարարությունը, թե այն ուժերը, ովքեր կընտրեն Տիգրան Ավինյանին, Դավիթ Խաժակյանին, Արտակ Զեյնալյանին, Տիգրան Խզմալյանին՝ նրանք ընտրում են Էրդողանին և Ալիևին՝ Զեյնալյանն ասաց. «Մելիքյան Ռուբենը եղել է Արցախի Մարդու իրավունքների պաշտպանը և պետք է, որ իմանար, որ ես ոտքս կորցրել եմ Արցախ-ադրբեջանական ճակատում, պետք է, որ իմանար, որ ես վիրավորվելուց հետո շարունակել եմ սահմանների այդ ճակատը պաշտպանել, պետք է իմանար, որ ես 2016թ. և 2020թ պատերազմներին մասնակցել եմ գրիչով և եթե մնացածների համար թեժ պատերազմն ավարտվել է, այն ինձ համար շարունակվում է և դեռ շատ երկար է շարունակվելու :
Այս քարոզարշավի ժամանակ մենք հայտարարում էինք, որ ընտրություններին մասնակցում են ուժեր, որ ֆինանսավորվում են Ռուսաստանից, ուղղորդվում և հրահանգավորվում են կրեմլից: Մենք չէին հստակեցնում, թե դրանք որ ուժերն են, մենք պետք է շնորհակալություն հայտնենք Ռոբերտ Քոչարյանին՝ իր խոսնակին, որ հստակեցրել է, թե դրանք որ ուժերն են, որ ուզում են Հայաստանում վերցնել իշխանությունը ճիշտ այնպես, ինչպես որ հեղաշրջում արեցին Արցախում: Արցախում այդ հեղաշրջումն արեցին այն պատրվակով, որ գործող լեգիտիմ նախագահը՝ առաջնային մանդատով օժտված նախագահը, ժողովրդի կողմից անմիջականորեն ընտրված նախագահը չէր պատրաստվում բացել Աղդամ-Շուշի ճանապարհը և դա պատրաստվում էր անել բացառապես զուգահեռաբար Լաչինչ միջանցքը բացվելու պարագայում: Այս պատրվակով իրականացվեց հեղաշրջում Արցախում, նաև ասեմ, որ այդ ընտրության լեգիտիմությունը չի ճանաչվել, և անմիջապես իշխանության գալուց հետո ճանապարհը միակողմանի բացվեց Աղդամի կողմից:
Այն իշխանափոխությունը, որ խոստանում են կամ գուժում են՝ դա ռուսական իշխանափոխությունն է, Կրեմլյան իշխանափոխությունն է Հայաստանում, որը բերելու է նույն հետևանքների, այսինքն փոխանակվելու է Լաչինի միջանցքը՝ Մեղրիի միջանցքի հետ: Մենք ևս մեկ անգամ պետք է շնորհակալություն հայտնենք տարանջատվելու համար, և ուժերի դասավորությունն այլևս պարզ է, այն ուժերը,որոնք չեն վկայակոչվել այդ հայտարարության մեջ, նրանք կրեմլյան ուժերն են, նրանք Մեղրիի միջանցքը հանձնող ուժերն են: Մեր տարածաշրջանում այդ պայքարը շարունակվում է: Ինչպես գիտեք այդ ծրագրին ընդդիմանալու համար իրենց կյանքը զոհաբերեցին Վազգեն Սարգսյանը, Կարեն Դեմիրճյանը և դաշինքը, որը ձևավորվել էր Հայաստանը հզորացնելու հեռանկարով»,-հայտարարեց Արտակ Զեյնալյանը:
Կարդացեք նաև
Ընդհանուր առմամբ, Զեյնալյանը քարոզարշավի ընթացքում ատելության մթնոլորտ արձանագրել է, նրա գնահատմամբ քաղաքական շատ ուժեր ատելության վրա են կառուցել իրենց քարոզարշավը ու կոչ արեց քաղաքացիների չընտրել ատելության խոսքը տարածող ուժերին: «Կոչ եմ անում ընտրել քաղաքական այն ուժին , որը Հայաստանի ինքնիշխանության և անկախության կողմնակիցն է, այն ուժին , որը չի գալու, որպեսզի Մեղրին հանձնի ռուս-ադրբեջանա-թուրքական տանդեմին»,-ասաց «Հանրապետության» քաղաքապետը և հավելեց,- «Այս անգամ ժողովրդին ավելի քիչ են հետաքրքրել տեղական խնդիրները՝ աղբահանություն-կոմունալ և այլն, քան անվտանգային խնդիրները, տարածաշրջանային և գլոբալ աշխարհաքաղաքական արտաքին մարտահրավերները: Հիմնականում այդ համատեքստում է անցել քարոզարշավը»:
Լուսինե ՄԱՐԳԱՐՅԱՆ
