«Անկեղծ ասած չգիտեմ… Այդ ձեւաչափը, երբ 14 մարդկանց տրվում է 30 վայրկյան, չեմ կարծում թե լուրջ է: Սա ավելի շատ պատկեր էր, քան բովանդակություն: Ամեն դեպքում հավասար պայմաններում էինք, ինչ-որ բան կարողացա տեղ հասցնել, ինչ-որ բան՝ ոչ:Կարծում եմ նորմալ էր, դժգոհելու բան չունեմ» ,-Aravot.am-ի հետ զրույցում ասաց «Հայաստանի Եվրոպական կուսակցության» նախագահ Տիգրան Խզմալյանը՝ խոսելով Հանրայինի եթերում ընտրություններին մասնակցող քաղաքական ուժերի ընտրական ցուցակների 1-ին համարների հետ բանավեճի մասին:
Հարցրինք, թե քարոզարշավի ավարտին ինչ արձանագրումներ են արել: «Կարծում եմ, որ բոլորս քննություն ենք հանձնում, ինչպես կուսակցությունները, այնպես էլ հասարակությունը: Ես տեսա, եւ մեր բանավեճը եւս մեկ անգամ ընդգծեց, որ պառակտումը շատ խորն է…Եթե քանակով հաշվենք, 10-11 կուսակցություն ակնհայտորեն քաղաքացիական պատերազմի կողմնակից են, միայն 2-3 կուսակցություն է արեւմտյան օրակարգը պաշտպանում: Ընտրություն կանի ժողովուրդը, որը շատ ավելի խոհեմ է, քան կարծում են քաղաքական գործիչները: Տեսնենք՝ ճի՞շտ եմ ես, թե ոչ»,-ասաց Տիգրան Խզմալյանը:
Գոհար ՀԱԿՈԲՅԱՆ
