Նիկոլ Փաշինյանի հեռացման շարժման կազմակերպիչ ԱԺԲ խորհրդի անդամներ Գարեգին Չուգասզյանը, Արա Պապյանը եւ Ժիրայր Սեֆիլյանը այսօր Ազատության հրապարակում մամուլի ասուլիս էին հրավիրել:
Բացման խոսքում Գարեգին Չուգասզյանն ասաց, որ շուրջ մեկ ամիս է, որ Ազգային ժողովրդավարական բեւեռը Ազատության հրապարակում 24-ժամյա նստացույց է իրականացնում, որին զուգահեռ սկսել են հանրահավաքների նոր ալիքը: Եվ այսօր ամփոփելու են մեկ ամսվա արածը, թե ինչ նպատակներ էր հետապնդում այս նոր արշավը, այս մեկ ամսվա ընթացքում ուր են հասել, ինչ է տեղի ունենում Հայաստանում, Հայաստանի շուրջ եւ աշխարհում:
Արա Պապյանը խոսեց աշխարհաքաղաքական այն մեծ փոփոխությունների մասին, որ տեղի են ունենում Հայաստանի շուրջ, հարեւան երկրներում, որոնք անդրադարձել են մեր վրա: Նրա խոսքով, ակնհայտ է, որ աշխարհը մոտենում է որոշակի հանգուցալուծման, հերթական մեծ փոփոխությունների ալիքն է գալիս, եւ այստեղ Հայաստանի ճիշտ դիրքավորումը Հայաստանի համար ճակատագրական է:
Նա ասաց, որ ԱԺԲ-ի առաջնային, բուն նպատակը ներկա իշխանությունների, մասնավորապես, Նիկոլ Փաշինյանի, հեռացումն է, որովհետեւ դա այն ճանապարհն է, որի միջոցով կարելի է վերականգնել մեր ինքնիշխանությունը եւ իրականացնել քաղաքականություն: Նաեւ նշեց, որ սահմանի ու Արցախի լարվածությունը, Հայաստանի ճակատագիրը իրականում լուծվում է իրենց զբաղեցրած Ազատության հրապարակում եւ լուծողը Հայաստանի ժողովուրդն է:
Կարդացեք նաև
Արա Պապյանի համար ակնհայտ է եւ պնդելու հիմքեր ունի, որ առաջիկայում Հայաստանում տեղի կունենան լրջագույն փոփոխություններ եւ Հայաստանում կհաստատվի ազգային իշխանություն, որովհետեւ ազգային իշխանությունն է, որ կկարողանա խնդիրներ լուծել:
Ժիրայր Սեֆիլյանը հիշեցրեց, որ հերթական հավաքը սեպտեմբերի 20-ին է եւ շատ բան է կախված ժողովրդի ներկայությունից: Ու եթե Ազատության հրապարակը լեցուն լինի, իրենք կանցնեն պայքարի այլ մակարդակի: Նա վերահաստատեց, որ աննախադեպ պայմաններ են ստեղծվել այս ռեժիմից հրաժարվելու համար: Իսկ թե դա երբ տեղի կունենա, մեծապես կապված է մարդկանց ակտիվության հետ: Իսկ որքան շուտ լինի փոփոխությունը Հայաստանում, այնքան լավ կլինի երկրի համար:
Նա նաեւ շեշտեց, որ ինֆորմացիոն արգելափակումը դժվարացնում է իրենց աշխատանքը, սակայն հանրության գիտակից շերտում սպասողական ինչ-որ բան են նկատում: ԱԺԲ խորհրդի անդամը նշեց, որ հենց Արցախում ինչ-որ բան է կատարվում, բազմահազար մտահոգ մարդիկ Երեւանից, մարզերից, սփյուռքից սկսում են խորհուրդների շարքը արցախցիներին, թե ինչ անեն: Եվ խորհրդատուներին հորդորեց չզբաղվել անիմաստ խորհուրդներով, որովհետեւ լուծումը Երեւանում է: Բայց Ժիրայր Սեֆիլյանը Երեւանի հրապարակներում հարյուր հազարավոր մարդկանց չի սպասում: Նրա համոզմամբ մի քանի տասնյակ հազար մարդու ներկայությունն էլ բավարար է, որպեսզի այս իշխանությունները եւ նրանց առաջնորդը, որին պաշտպան մնացել են միայն Ալիեւը եւ Էրդողանը, շատ արագ հեռացվեն: Ու շատ կարեւորեց, որ այդ հեռացումը լինի հնարավորինս անցնցում: Նաեւ ասաց, որ իրենց պատկերացմամբ իշխանափոխությունից հետո չի լինելու ոչ նախկինների վերադարձ, ոչ ներկա իշխանությունների վերարտադրություն:
Աշոտ ՀԱԿՈԲՅԱՆ
