«Բավականին բարդ գործընթացում ենք, և որևէ մեկը չի ասել, որ խաղաղության, հարաբերությունների կարգավորման փաստաթուղթը հեշտ է տրվելու»,- հիշեցմանը՝ խաղաղության բանակցությունների արդեն հինգերորդ շրջափուլն է, սակայն սահմանին կուտակումներ են, լարվածությունը շարունակվում է և հարցին՝ սա չի՞ նշանակում, որ խաղաղության բանակցությունները փակուղի են մտել, լրագրողների հետ ճեպազրույցում այսպես պատասխանեց ՔՊ խմբակցության պատգամավոր Արթուր Հովհաննիսյանը։
Նա նշեց, որ բազմաթիվ դրվագներում մեր և Ադրբեջանի մոտեցումները դեռևս հեռու են իրարից․ «Հինգերորդ շրջափուլն է, հիմա ստացել ենք Ադրբեջանի կողմից առաջարկները, դրանք կուսումնասիրվեն մեր կողմից, և կլինի հետագա գործընթաց։ Գործընթացը շարունակվում է․ ոչ մի գործընթաց փակուղում չի գտնվում, որքան էլ որ բարդ է իրավիճակը, որքան էլ կուտակումներ կան սահմաններին»։
Հարցին՝ փակագծեր կբացե՞ք՝ նախկինում ասվել է, որ ադրբեջանական կողմը ՀՀ առաջարկները ջնջած հետ է ուղարկում, նա շարունակո՞ւմ է այս մոտեցումը, ՔՊ խմբակցության պատգամավոր Արուսյակ Ջուլհակյանը պատասխանեց․ «Ադրբեջանի վերջին առաջարկներին դեռ ծանոթ չենք։ Ամեն դեպքում ասեմ՝ ջնջած հետ ուղարկելը, վերաձևակերպվածն է՝ նույն բանն ավելի մեղմ ասած։ Համենայն դեպս, ինչպես նախկինում նշել ենք, կան կոնկրետ կետեր, որոնց շուրջ համաձայնության դեռ չենք կարողանում հասնել, բայց շարունակում ենք բանակցել։ Ասել ենք, որ ՀՀ-ի նպատակներից մեկը տարածաշրջանում խաղաղության ու կայունության հասնելն է»։
Արթուր Հովհաննիսյանն էլ «ջնջել» եզրույթի հետ կապված արձագանքեց․ «Առհասարակ խոսակցությունները և գործընթացը ջնջել, խմբագրել, վերախմբագրելը մոտեցումները մոտարկելու մասին են։ Ինչպես Ադրբեջանի առաջարկներին հայկական կողմից որոշակի առաջարկներ, խմբագրումներ են լինում, նորմալ գործընթաց է։ Գույները «ջնջել» բառով խտացնել պետք չէ»։
Կարդացեք նաև
Հարցին՝ ամենասուր տարաձայնությունները ո՞ր հարցերում են շարունակում մնալ, Արթուր Հովհաննիսյանը պատասխանեց․ «Հիմնական ամենագլխավոր կետերը, եթե նշենք, դրանք փոխադարձաբար տարածքային ամբողջականության ճանաչումն է, ԼՂ ժողովրդի իրավունքների և անվտանգության իրացումը, ՀՀ ինքնիշխանության պահպանումը։ Սրա տակ կան բացվածքներ, որոնք այս պահին հրապարակային խոսելու կարիք չունենք։ Խաղաղության պայմանագրում պետք է հստակ մեխանիզմներ լինեն և երաշխիքներ, որոնք կապահովեն ՀՀ տարածքային ամբողջականությունը և ինքնիշխանությունը։ Մինչև այս պահը դեռ չի հաջողվել մոտարկել մոտեցումներն այս առումով։ Փոխադարձ պայմանավորվածություն է ձեռքբերվել ՀՀ վարչապետի և Ադրբեջանի ղեկավարի միջև փոխադարձաբար տարածքային ամբողջականությունը ճանաչելու մասին, բայց մինչև այս պահը այս պայմանավորվածությունը կյանքի չի կոչվել»։
Արուսյակ Ջուլհակյանն էլ հստակեցրեց․ «Բանավոր պայմանավորվածություններ փոխադարձաբար միմյանց տարածքային ամբողջականությունները ճանաչելու մասին կան։ Բանավոր պայմանավորվածությունների մասին եմ խոսում, որը տեղի է ունեցել նախորդ տարի հոկտեմբերի 7-ին՝ Պրահայում, 2023-ի մայիսին է վերահաստատվել։ Այդ մասին եմ խոսում, որ փոխադարձ երկու երկրները պայմանավորվել են ճանաչել միմյանց տարածքային ամբողջականությունը բանավոր, բայց գրավոր ձևակերպումը, որը մենք կարող ենք ամրագրել խաղաղության պայմանագրով, այս պահի դրությամբ դեռ ՀՀ-ին չի բավարարում»։
Տաթև ՀԱՐՈՒԹՅՈՒՆՅԱՆ
