Ադրբեջանի արտգործնախարար Ջեյհուն Բայրամովը ՄԱԿ-ի մարդու իրավունքների խորհրդի 54-րդ նստաշրջանում իր ելույթում Հայաստանին մեղադրել է կարգավորման գործընթացում իր պարտավորություններից հրաժարվելու մեջ:
«Հայաստանը, որ շարժվում է ռևանշիստական տրամադրություններով և փորձում է հետ քաշվել կարգավորման գործընթացի շրջանակում իր պարտավորություններից, ակտիվորեն քարոզում է էթնիկ ատելություն, աղավաղում է փաստերը, մանիպուլացնում է էթնիկ հայերին և մոլորության մեջ գնում միջազգային հանրությանը բեմադրված թեզերով»,- ասել է Բայրամովը:
Նրա խոսքով՝ Հայաստանի քաղաքականությունն ուղղված է նրան, որ խանգարի Ղարաբաղի հայերի վերաինտեգրմանը, մինչդեռ «Ադրբեջանը երաշխավորում է բոլոր համապատասխան իրավունքներն ու ազատությունները, որոնք ամրագրված են իր Սահմանադրությամբ և միջազգային մեխանիզմներով»:
Բայրամովը նաև անթույլատրելի է համարել ցանկացած միջամտություն իր ներքին գործերին՝ հայտարարելով, որ «այդպիսի յուրաքանչյուր փորձ պետք է դատապարտվի և վճռականորեն մերժվի միջազգային հանրության կողմից»:
Կարդացեք նաև
«Այս ծայրահեղ պահին Ադրբեջանն ակնկալում է, որ միջազգային հանրությունն իր վրա ավելի մեծ պատասխանատվություն կվերցնի՝ կոչ անելով Հայաստանին հրաժարվել իր անպատասխանատու վարքից, ագրեսիվ քաղաքականությունից և կատարել իր պարտավորությունները»,- ասել է Բայրամովը:
Նա նաև ընդգծել է, որ Բաքուն ակնկալում է, որ ՄԱԿ-ը, մասնավորապես մարդու իրավունքների գերագույն հանձնակատարը ուշադրություն կդարձնի «նախկինում Հայաստանի իրենց տներից վտարված ադրբեջանցիների» իրավունքների հետ կապված հարցերի վրա: Ըստ Բայրամովի՝ կարևոր է, որպեսզի Երևանը պատասխանատվության ենթարկվի «մարդու իրավունքների ոլորտում լուրջ խախտումների համար»:
Պատրաստեց Վիկտորյա ԱՆԴՐԵԱՍՅԱՆԸ
