Aravot.am-ը «Ժողովրդավարական համախմբում» կուսակցության նախագահ Սուրեն Պետրոսյանից հետաքրքրվեց, թե ինչ արձանագրումներ են արել քարոզարշավի ավարտին եւ ինչ տպավորություններ ստացել քաղաքացիների հետ հանդիպումներից:
«Ամենակարևոր արձանագրումն այն է, որ այն օրակարգը, որ առաջարկվում էր, իրականում բավականին մեծ պահանջարկ ունի, եթե կարելի է այսպես ասել: Այսինքն` մարդկանց խնդիրներն իրականում ամբողջությամբ այլ են, եւ չի եղել այնպիսի մի բակ, որտեղ դա չհաստատվի եւ չապացուցվի:
Երկրորդը, որ մարդկանց մոտ կա բավականին մեծ անվստահություն բոլոր քաղաքական ուժերի նկատմամբ, եւ երրորդը, որ մեզ համար շատ ուրախալի էր, այն է, որ հասարակության մոտ կա ծայրահեղ բացասական վերաբերմունք գործող իշխանության նկատմամբ։ Նույնիսկ երբ բուկլետ էինք տալիս, առաջին հարցը լինում էր՝ դուք ներկաների հետ կապ ունե՞ք: Ասում էինք՝ ոչ, նոր բուկլետը վերցնում էին: Երկրորդ հարցը՝ իսկ նախկինների հետ, ասում էինք՝ չէ, նոր հանգիստ խղճով բուկլետը վերցնում էին: Կատեգորիկ բացասական վերաբերմունք կա իշխող ուժի նկատմամբ: Նաեւ ինչու չէ՝ նաեւ նախկին ղեկավարների նկատմամբ: Մենք չենք կարող վերադառնալ անցյալ ու դառնալ առաքինի »,-ասաց Սուրեն Պետրոսյանը:
Նրա խոսքով. «Իհարկե, դա չի կարելի առավելություն համարել, բայց հենց մարդիկ նոր ուժ են տեսնում, միանգամից ուրախանում էին, եւ կարծես դրա մեջ փորձում եին նոր հնարավորություն, փրկության նոր ճանապարհ փնտրել»:
Կարդացեք նաև
Քաղաքական ուժերի ցուցակների 2–րդ համարների բանավեճին էլ անդրադարձ եղավ: Հարցրինք՝ դա հնարավորություն տվե՞ց իրենց գաղափարները, տեսակետը հասցնել ընտրողներին: «Կարծում եմ, որպես այդպիսին՝ ոչ, ինչը օրինաչափ է, ձեւաչափն այդքան էլ նման հնարավորություն չէր տալիս, բայց հուսով եմ, որ սեպտեմբերի 14-ին ավելի մեծ հնարավորություն կարող է լինել»,-ասաց Սուրեն Պետրոսյանը:
Պատասխանելով խախտումների մասին մեր հարցին՝ «Ժողովրդավարական համախմբում» կուսակցության նախագահը նշեց. «Անհավանական մեծ ծավալի վարչական ռեսուրս է օգտագործվում իշխող ուժի կողմից, ինչը շատ բացասական է, բայց օրինաչափ, դա այն է, ինչ որ կա: Համոզված եմ, որ ընտրության ժամանակ էլ աննախադեպ խախտումներ են լինելու, որովհետեւ իրականում իշխանության ռեյտինգը չափազանց ցածր է ու առանց հսկայական խախտումների հնարավոր չէ հաղթանակ տանել կամ հավաքել բավարար տոկոսներ»:
Գոհար ՀԱԿՈԲՅԱՆ
