Ադրբեջանը դեռ չի արձագանքել «խաղաղության պայմանագրի» շուրջ հայկական կողմի վերջին առաջարկներին։ Այս մասին այսօր խորհրդարանում լրագրողների հետ ճեպազրույցում ասաց ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը։ «Իմ տեղեկություններով՝ մինչեւ այս պահն Ադրբեջանը դեռեւս չի արձագանքել այդ առաջարկներին»,- ասաց նա։
Սարգիս Խանդանյանի խոսքով՝ Հայաստանի սահմանին զորքերի կուտակումները փաստում են Ադրբեջանի ագրեսիվ քաղաքականության, ստանձնած պարտավորությունները չկատարելու եւ հարցերն ուժի միջոցով լուծելու հերթական փորձի մասին։ «Եվ պետք է սրան շատ աչալուրջ վերաբերվել։ Գիտեք, որ բազմաթիվ միջազգային շփումներ են տեղի ունեցել այս ընթացքում, որպեսզի ավելացվի ճնշումն Ադրբեջանի վրա, եւ Ադրբեջանը չփորձի ուժի կիրառմամբ որեւէ հարց լուծել։ Ես կարծում եմ, որ Լեռնային Ղարաբաղում շարունակվող հումանիտար ճգնաժամը եւ նաեւ Ադրբեջանի այս ագրեսիվ քաղաքականությունը բացասաբար են ազդում բանակցությունների վրա։ Բայց սա չի նշանակում, որ Հայաստանը պետք է հետ կանգնի խաղաղ ճանապարհով խնդիրները հանգուցալուծելու եւ խաղաղության համաձայնագիր ստորագրելու իր նպատակից։ Ուստի, Հայաստանը պատրաստ է ցանկացած պահի վերադառնալ բանակցությունների սեղան եւ շարունակել հարցերի քննարկումները»,- ասաց նա։
Խանդանյանը նշեց, որ Հայաստանի իշխանությունը մեղավորություն չի զգում Լաչինի միջանցքի փակման հարցում։ «Մեղավորն Ադրբեջանն է, Ադրբեջանն է փակել Լաչինի միջանցքը»,- ասաց նա։
Անդրադառնալով հարցին, որ երեկ ռուսական բեռների համար բացվեց Ակնայի ճանապարհը, Խանդանյանն ասաց․ «Լեռնային Ղարաբաղում հումանիտար վիճակը բարելավելու, ընդհանրապես ԼՂ հայությանը պաշտպանելու տեսանկյունից չափազանց կարեւոր է Լաչինի միջանցքի անհապաղ բացումը։ Իսկ մյուս ճանապարհների հետ կապված այդ հարցերով ես չէի ցանկանա մեկնաբանություններ տալ, որովհետեւ դա Լեռնային Ղարաբաղի իշխանությունների եւ ժողովրդի որոշելիքն է։ Եվ չեմ կարծում, որ այստեղ Հայաստանը պետք է միջամտի»։ Նա նշեց, որ չի տիրապետում միջանցքի բացման մասին տեղեկատվությանը։
Կարդացեք նաև
Ռոզա ՀՈՎՀԱՆՆԻՍՅԱՆ
