Հայաստանի կողմից Միջազգային քրեական դատարանի Հռոմի ստատուտի հնարավոր վավերացումը Ռուսաստանը դիտում է որպես ոչ բարեկամական քայլ: Այս մասին Արևելյան տնտեսական ֆորումի շրջանակում հայտարարել է Ռուսաստանի ԱԳՆ խոսնակ Մարիա Զախարովան:
Նա հիշեցրել է, որ այդ կապակցությամբ Հայաստանի դեսպանին արդեն հրավիրել են ԱԳՆ՝ նրան բողոք ներկայացնելով ոչ բարեկամական գործողությունների համար:
«Երևանի շարժառիթները պետք բացատրվեն և մեկնաբանվեն հայկական կողմից: Ինչի՞ համար է դա արվում, ինչո՞ւ: Նրանք, ի դեպ, ներկայացրել են իրենց գնահատականները: Բայց մենք այդպիսի քայլերը գնահատում ենք որպես ոչ բարեկամական, ինչի մասին բազմիցս ասել ենք մեր հայ բարեկամներին, գործընկերներին»,- ասել Զախարովան:
Նրա խոսքով՝ վավերացումը մեկանգամյա գործողություն չէ, որը, ինչպես հայկական կողմն է ընկալում, արդարացի հարցեր է առաջ բերում, այլ՝ քայլերի համալիր:
Կարդացեք նաև
Նա ընդգծել է, որ Ռուսաստանը, անկասկած, Հայաստանը համարում է ինքնիշխան պետություն: Սակայն Մոսկվան նախկինում է էլ խոսել է Հայաստանի գործողությունների և հայտարարությունների վնասակարության մասին, որոնք կարող են խաթարել հայ-ադրբեջանական կարգավորման գործընթացը՝ դեպի վատթարացում և էսկալացիա:
«Դրանք կխանգարեն այն ամենի իրականացմանը, որոնց մասին պայմանավորվածություն է ձեռք բերվել ռուսական միջնորդությամբ: Դրանք բոլոր այն արձանագրված հայտարարություններն են, որոնք հավանություն են ստացել երեք պետությունների ղեկավարների կողմից»,- ասել է Զախարովան:
Պատրաստեց Վիկտորյա ԱՆԴՐԵԱՍՅԱՆԸ
