«Ես ո՛չ ռուսամետ, ո՛չ էլ արեւմտամետ եմ»,-այսօր ֆեյսբուքյան ուղիղ եթերում պատասխանելով օգտատերերի հարցերին, ասաց «Արցախի անվտանգության եւ զարգացման ճակատ» հանրային շարժման համակարգող, Արցախի Հանրապետության նախկին պետնախարար Ռուբեն Վարդանյանը։
Վարդանյանի խոսքով․ «Ես հայամետ եմ։ Ես ասել եմ՝ ինչ-որ օգնելու է Հայաստանին եւ Արցախին, հայկական աշխարհին, մենք պետք է ամեն ինչ օգտագործենք, եւ ամենաճիշտ ճանապարհն է սովորելը, թե ինչպես են իրենց պահում խելացի մարդիկ։ Թշնամուց էլ է պետք սովորել։ Էրդողանը լավ օրինակ է ցույց տալիս, թե ինչքան լավ է համագործակցում ե՛ւ Ռուսաստանի հետ, ե՛ւ Եվրոպայի, Արեւմուտքի, նաեւ Ուկրաինայի հետ։ Ուղղակի դա կախված է նրանից՝ արդյոք դու ունես ռազմավարություն, սկզբունքներ, թե ինչ պիտի անես»։
Հայաստանը Թաթարստան դարձնելու ձեր պլանն ուժի մե՞ջ է․ հետաքրքրվել է օգտատերերից մեկը։ Ի պատասխան Վարդանյանն ասաց․ «Դա իմ պլանը չի եղել։ Այդ պլանն իրականացնում են ուրիշ մարդիկ, որոնք ուզում են ամեն ձեւով վարկաբեկել ինձ։ Ես ասել եմ՝ մենք ունենք չորս սցենարներ, այդ սցենարների տարբերակների մասին եմ խոսել։ Եվ երեք սցենարն այն է, որ․․․ կամ Փաշինյանը, որը ցավոք սրտի իշխանություն է եւ առանց հասկանալու անում էր եւ անում է այնպես, որը բերելու է շատ ցավալի տարբերակների, որից մեկը կարող է լինել, որ Հայաստանը դառնա Ռուսաստանի մի մաս, որն ինձ համար ընդունելի չէ։
Բայց եթե դա լինելու է, մենք որպես մարդ, որոնք պատասխանատու են ոչ միայն իրենց համար, այլ ազգի համար, պետք է անենք ամեն ինչ, որ դա դառնա ամենացածր գինը։ Ես միշտ ասել եմ, որ ես իհարկե Հայաստանը տեսնում եմ որպես hub, որը կապելու է աշխարհի տարբեր պետությունները՝ Ռուսաստանը, Իրանը, Եվրամիությունը, ԱՄՆ-ն, Չինաստանը, Հնդկաստանը եւ մենք ունենք այդ հնարավորությունը, որը պետք է օգտագործենք։ Ինձ թվում է, որ այդ մարդիկ, որոնք օգտագործում են այդ թեզը, ուզում են ինչ-որ ձեզով անպայման «յարլիկ» կպցնեն»։
Կարդացեք նաև
Մանրամասները՝ տեսանյութում
Նելլի ԲԱԲԱՅԱՆ
