«Պարո′ն պատգամավոր, ՀՀ ԱԺ պատգամավոր, ուզում եմ հարցնել՝ ո՞ւմ արյամբ եք պատրաստվում փոփոխություն անել»,-ՀՀ ԱԺ նիստի ժամանակ արձագանքելով ՀՀ ԱԺ «Պատիվ ունեմ» խմբակցության ղեկավար Հայկ Մամիջանյանի պնդումներին, հայտարարեց ՀՀ ԱԺ ՔՊ խմբակցության պատգամավոր Ծովինար Վարդանյանը։
Նա շարունակեց․ «Բացի այն, որ ինչ-որ խորհրդավոր տոնայնություն էր հաղորդում իր խոսքերին, փորձում էր երկիմաստություն մտցնել, խորիմաստ դեմքով ինչ-որ բաներ էր ակնարկում ժողովրդին, չխորշեց նաև հանդես գալ բռնության կոչով՝ ասելով, որ արյամբ է փոխվելու Երևանը։ Արդյոք ՀՀ քաղաքացին Ձեզ համար ընդամենը ռեսո՞ւրս է Ձեր անձնական շահը և նկրտումներն իրականություն դարձնելու համար։ Ամեն ՀՀ քաղաքացու արյուն պետք է թանկ լինի ՀՀ ԱԺ պատգամավորի համար։ Հասկանում եմ Ձեր աշխատելաոճը, ապրելաոճը կեղտոտ ջրում ձուկ որսալու, դրա համար էլ ձեր բոլոր խոսափողներն այս պահին միացված են, տարբեր մարդիկ տարբեր տեղեր հարցազրույցներ ու ճեպազրույցներ են տալիս։ Բայց ուզում եմ, նաև հասկանում եմ, թե ինչից է գալիս, քանի որ բանաձևի արդյունքում մանդատ շահած պատգամավորը գուցե չի հասկանում քաղաքացու և իր կրած մանդատի միջև կապը։ Նաև ուրախ եմ, որ Դուք Ձեզ այդքան լուրջ եք ընկալում և այդքան կշիռ եք տալիս, բայց խորհուրդ կտամ անել այնպես, որ ՀՀ քաղաքացին կիսի Ձեր կարծիքը»։
Տաթև ՀԱՐՈՒԹՅՈՒՆՅԱՆ
