Երեւանի ավագանու այսօրվա նիստում «Իմ քայլը» խմբակցության անդամ Գառնիկ Վարդանյանի եւ «Լույս» խմբակցության անդամ Անի Խաչատրյանի միջեւ վեճ տեղի ունեցավ:
Մի հարցի քննարկման ժամանակ Գառնիկ Վարդանյանը փորձեց պարզաբանում տալ. «Ես ուզում եմ բացառել, որ որեւէ պետական գերատեսչություն այսքան ժամանակ ստիպի իր աշխատակիցներին, որ որեւէ բանկից օգտվեն: Ես բացառում եմ դա»:
Անի Խաչատրյանը միջամտեց, ասաց՝ դուք գիտե՞ք, որ ավագանու անդամը ավագանու անդամին չի պատասխանում, ձեւը չգիտե՞ք, չսովորեցի՞ք 5 տարի:
«Ես ավագանու անդամին չեմ պատասխանում, ես ինքս իմ նկատառումներն ունեմ: Ես չեմ պատասխանում որեւէ մեկի հարցին, հարց չի հնչել, տիկին Խաչատրյան: Խնդրում եմ, մի խանգարեք իմ ելույթը, թողեք ավարտեմ, խնդրում եմ, մի լարեք մթնոլորտը, թույլ տվեք խոսեմ»,-ասաց Գառնիկ Վարդանյանը։ Նրա ելույթի ժամանակ Անի Խաչատրյանը տեղից ռեպլիկներ էր անում։
Կարդացեք նաև
«Դու ո՞վ ես»,-Անի Խաչատրյանի այս ռեպլիկին ի պատասխան Վարդանյանն ասաց՝ տիկին Խաչատրյան, բա դուք ո՞վ եք:
«Դուք օրենսդիր եք, գործադիր չեք, դուք ո՞նց կարաք բացառեք»,-փորձեց պարզաբանել Խաչատրյանը: Հետո նրանց միջեւ վեճը թեժացավ ընդհուպ մինչեւ փողոցային մակարդակի։
«Տիկին Խաչատրյան, որ էս դահլիճից դուրս գաք, գալու եք ժպտաք, փաթաթվեք, բայց երբ հայտնվում եք նիստերի դահլիճում, տենց արտահայտություններ եք անում»,-ասաց Գառնիկ Վարդանյանը:
«Կարող է դուրս գանք միջանցք, հանկարծ շատ դժբախտ պատահար ձեզ հետ հեսա պատահի»,-արձագանքեց Անի Խաչատրյանը:
«Դե փորձեք»,-մի փոքր բորբոքվեց Վարդանյանը։
«Դե արի դուրս գանք: Դե արի»,-Վարդանյանին դուրս հրավիրեց Անի Խաչատրյանը։
«Հեսա դուրս կգանք»,- պատասխանեց Գառնիկ Վարդանյանը։
«Դե արի, երեւի դուրս գանք, թե՞ ես գամ ձեզ հանեմ ստեղից: Դե արի հլը, թե՞ էդքան տղա չես»,-ժպիտով սադրեց Անի Խաչատրյանը:
Գառնիկ Վարդանյանն արձագանքեց․«Խնդրում եմ, ձեր դիրքին հարիր պահեք ձեզ: Ես հունից դուրս չեմ գա, ափերից դուրս չեմ գա: Ես չեմ իջնի ձեր մակարդակին ու չեմ արձագանքի ձեզ»:
«Դու էդքան չկաս, որ հունից դուրս գաս»,-ասաց Անի Խաչատրյանը:
Նիստը վարող քաղաքապետի պաշտոնակատար Լեւոն Հովհաննիսյանը փորձում էր միջամտել, դադարեցնել վեճը, սակայն չստացվեց։ Վեճն ավարտվեց կողմերի ցանկությամբ։
Մանրամասները՝ տեսանյութում
Նելլի ԲԱԲԱՅԱՆ
