«Որևէ չափորոշիչ, մոտեցում կա՞, թե տուգանքներն ինչքանով ավելացնենք։ Ձեզ մոտ երեք անգամ էր։ Երեկ օրենքի նախագիծ էին բերել, որտեղ 10 անգամ են մեծացնում տուգանքի չափը։ Կա՞ արդյոք որևէ չափորոշիչ, թե ինչո՞ւ, ի՞նչ տրամաբանությամբ են տուգանքների չափերը մեծացնում, թե՞ եղանակից է կախված»,- ՀՀ ԱԺ նիստի ժամանակ հարցրեց ՀՀ ԱԺ «Հայաստան» խմբակցության պատգամավոր Արթուր Խաչատրյանը։
ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանը ներկայացրեց «Վարչական իրավախախտումների վերաբերյալ Հայաստանի Հանրապետության օրենսգրքում լրացումներ եւ փոփոխություններ կատարելու մասին օրենքի նախագիծը, որով նախատեսվում է եռապատկել այն իրավախախտումները, որոնք կապված են ճանապարհների վնասման հետ։ Նախարարի տեղակալը նաև նշեց, որ քրեական օրենսգրքում փոփոխությունների նպատակն է կանխել նոր իրավախախտումները, բարձրացնել հանրության պատասխանատվությունը ճանապարհների օգտագործման, պահպանման վերաբերյալ, ինչպես նաև փոխել հանրության վարքագիծը։
Պատասխանելով հարցին՝ Քրիստինե Ղալեչյանն ասաց․ «Մեր առաջարկած փաթեթի հիմքում որոշակիորեն փորձել ենք գնահատել իրավախախտման հանրային վտանգավորության աստիճանը։ Այնպիսի իրավիճակներ, որոնք ճանապարհային երթևեկության առումով ռիսկեր են ձևավորում, ավելի մեծ շրջանակ ունեն։ Ուսումնասիրել ենք միջազգային փորձը, նույնիսկ համեմատել ենք Վրաստանի հետ, և մեր առաջարկած պատասխանատվության չափը համահունչ էր արդեն իրենց մոտ կիրառվող պատասխանատվության չափերին։ Իսկ Եվրոպայում, ԱՄՆ-ում, Կանադայում ավելի բարձր ու խիստ են»։
Արթուր Խաչատրյանը նաև նկատեց՝ հաճախ տեսնում ենք՝ մասնավոր շինարարություն է իրականացվում, շինարարության իրականացման համար փողոցի մի մասը զավթվում է։ Հարցին՝ ձեր ներկայացրած փաթեթն արդյոք այս դեպքերի դեմ որոշակի միջոցներ ձեռնարկո՞ւմ է։ Քրիստինե Ղալեչյանը պատասխանեց․ «Նախագծով պետք է սահմանվեն շինհրապարակի անվտանգության պահանջները, որոնց նկատմամբ հսկողություն է լինում, պետք է պահպանվեն երթևեկության համապատասխան լուծումների տրմամբ, անվտանգության հիմնական միջոցառումով, որոնք այս նախագծի տիրույթից դուրս են»։
Կարդացեք նաև
Քրիստինե Ղալեչյանն ասաց, որ վերջին երկու ամսվա ընթացքում միայն միջպետական ճանապարհներից շուրջ 85 ճանապարհային նշան է գողացվել, 86 գծամետր արգելափակոց է վնասվել։
Տաթև ՀԱՐՈՒԹՅՈՒՆՅԱՆ
