Ոսկրային արգանակը, որը սովորաբար պատրաստվում է տավարի կամ հավի ոսկրերից (ըստ նախասիրության՝ նաև խոզի ոսկրերից, ձկան ոսկրերից ու փշերից), պարունակում է մի շարք սննդանյութեր, որոնք առողջությանը նպաստող մեծ պոտենցիալ ունեն՝ սկսած օրգանիզմում բորբոքային գործընթացների նվազեցումից մինչև սպիտակուցի քանակի ավելացում։
Արգանակներն առհասարակ հնուց ի վեր լայնորեն կիրառվել են տարբեր ժողովուրդների կողմից՝ դառնալով հիմք շատ ազգային կերակրատեսակների համար, օրինակ՝ ուխայի (ձկնապուր), սուշիի, որի բրինձը պատրաստվում է կոմբու ջրիմուռից պատրաստված արգանակով, խաշի և այլն։ Ի դեպ, ինչպես որ «խաշ» ուտեստի անվան ծագումն է կապվում «խաշել» բառի հետ, այնպես էլ բուլյոն՝ «արգանակ» բառն է առաջացել ֆրանսերեն «bouillir»՝ «եռալ» բառից։
Հագեցած ու բուրավետ ոսկրային արգանակ ստանալու համար անհրաժեշտ է եփել ոսկրերը 12 ժամից ավելի՝ մարմանդ կրակի վրա․ այդ ժամանակահատվածն օգնում է ոսկրերից դուրս բերել կոլագենը՝ սպիտակուցը, որը պարունակում է այնպիսի ամինաթթուներ, ինչպիսիք են արգինինը, գլուտամատը, հիդրօքսիլիզինը, հիդրօքսիպրոլինը, պրոլինը և գլիցինը։ Այսպիսով առանձնացված կոլագենն առավել արդյունավետ է օգտագործման համար։
Կարդացեք նաև
Ոսկրային արգանակն ավելի սննդարար դարձնելու համար այն եփելու ընթացքում կարող եք 1-2 ճաշի գդալ քացախ ավելացնել, ինչը թույլ կտա ավելի շատ հանքանյութեր առանձնացնել ոսկրերից եռման ընթացքում։
Որո՞նք են ոսկրային արգանակի հիմնական առավելություններն առողջության համար
Ոսկրային արգանակը սպիտակուցի աղբյուր է
Ինչպես նշվեց, ոսկրային արգանակի հիմնական սննդանյութը կոլագենն է՝ սպիտակուցի տեսակ, որն օգտագործվում է օրգանիզմի շարակցական հյուսվածքի ստեղծման համար։ Սպիտակուցը հատկապես կարևոր է, երբ խոսք է գնում մկանների վերականգնման ու ֆիզիկական ծանրաբեռնվածության համար։
Ինչպես նշում է սննդաբան Մաքքենզի Քոլդուելը ԱՄՆ-ի Հյուսիսային Կարոլինայից․«Ոսկրային արգանակը հատկապես օգտակար է հղիության ընթացքում և հետծննդաբերական վաղ շրջանում։ Կոլագենով հարուստ այդ հեղուկը նպաստում է պտղի ոսկրերի ու հոդերի ձևավորմանը»։
Ոսկրային արգանակն ապահովում է օրգանիզմի խոնավացումը
Ոսկրային արգանակը խոնավացնող ազդեցություն ունի, քանի որ հարուստ է հեղուկով ու էլեկտրոլիտներով։
Նպաստում է վերքերի լավացմանն ու մաշկի էլաստիկությանը
Կոլագենը հայտնի է իր՝ մաշկի վիճակը բարելավող ազդեցությամբ, այն ոչ միայն նպաստում է մաշկի երիտասարդությանն ու էլաստիկությանը, այլև վերքերի արագ ապաքինմանը։
Ոսկրային արգանակը հոգում է ոսկրերի ամրության ու հոդերի առողջության համար
Ոսկրային արգանակը հարուստ է այնպիսի հանքանյութերով, որոնք անհրաժեշտ են ոսկրերի ամրության համար՝ կալցիումով, մագնեզիումով, ֆոսֆորով, իսկ պատրաստման դանդաղ ժամանակահատվածը թույլ է տալիս առանձնացնել նաև լրացուցիչ սննդանյութեր ու միացություններ, ինչպիսիք են գլյուկոզամինն ու խոնդրոիտինը, որոնք, ինչպես հայտնի է, անհրաժեշտ են հոդերի առողջության համար։
Ոսկրային արգանակը կարելի է պահել սառնարանում 3-4 օր կամ սառցախցիկում՝ 2-3 ամիս։
Ոսկրային արգանակն ունի արդյո՞ք հակացուցումներ
Ոսկրային արգանակը մարդկանց մեծամասնության համար անվնաս է, սակայն պետք է հաշվի առնել, որ օգտակար սննդանյութերից զատ այն պարունակում է նաև որոշ հանքանյութեր, որոնք մեծ քանակությամբ օրգանիզմ ներթափանցելու դեպքում վնասակար են մարդու համար։ այդ հանքանյութերն են կապարն ու կադմիումը, որոնց պարունակությունը ոսկրային արգանակում թեև շատ ցածր է, բայց և արգանակի մեծաքանակ օգտագործումը կարող է բարձրացնել դրանց մակարդակն օրգանիզմում։
Ոսկրային արգանակի օգտագործման հակացուցում է նաև օրգանիզմի հիստամինային անընդունելիությունը, որն առաջանում է, երբ օրգանիզմը չի կարողանում յուրացնել սննդից ստացվող հիստամինը, ինչն ալերգիկ ռեակցիաների է հանգեցնում, օրինակ՝ աչքերի քորի կամ քթի փակվածության։
Պատրաստեց Մարինե ԱԼԵՔՍԱՆՅԱՆԸ
Նյութը պարունակում է տվյալներ հետևյալ աղբյուրից
Գլխավոր լուսանկար՝ Getty Creative
