Այսօր «Ապրելու երկիր» կուսակցությունը նախընտրական քարոզարշավ իրականացրեց Շենգավիթ վարչական շրջանում:
Կուսակցության թիմակիցները բակերում թզբեհով, առանց թզբեհի, պպզած եւ կանգնած, նարդի ու բլոտ խաղացող բնակիչներին բաժանեցին նախընտրական ծրագրի սեղմագրերը եւ հորդորեցին կարդալ, գիտակից ընտրություն կատարել:
Կարդացեք նաև
Թանդիլյանն ասաց, որ այս ընտրություններով մարդիկ կարող են փոխել իրավիճակը. «Մենք ձեզ խոստացել ենք, որ տրանսպորտին սպասելու եք 8 րոպե, ոչ ավելի: Մենք ամենայն պատասխանատվությամբ ենք պատրաստվել այս ընտրություններին, հերթը ձերն է: Հերթը ձերն է հնարավորություն տալու Երեւանին ու մեր երկրին ազատվել այս կործանարար իշխանություններից, որոնք ատելություն է սերմանում մեկը մյուսի նկատմամբ: Ազատեք մեր երկիրը, դուք դա կարողանում եք անել 5 տարին մեկ անգամ: Դուք կարող եք որոշել այսպիսի ընթացքը կշարունակվի՞, թե՞ կփոխվի: Մենք լավագույն առաջարկով ենք գալիս, Երեւանը դարձնելու ենք ժամանակակից, որակյալ լուծումներով քաղաք»:
Մանե Թանդիլյանը այսպես ծրագիրը ներկայացնելով քայլում էր, երբ Շենգավիթում նրան մոտեցավ ու փողոցում վզովն ընկնելով՝ սկսեց համբուրել մի կին՝ ասելով. «Ուզում էի քեզ տենայի անձամբ: Գոհար Ազատյանն եմ ես՝ երրորդմասցի Գոգոն»,- ասաց նա՝ աչքով արեց ու հեռացավ:
«Ապրելու երկիրը» քարոզարշավը շարունակեց Նորագավիթում:
Այստեղ դեռ հնամաշ «պազիկներ» տեսնելով՝ Թանդիլյանը հիշեցրեց, թե ինչպես են Երեւանում տրանսպորտային համակարգը վերափոխելու ու հարմարեցնելու քաղաքացուն. «Հեռավոր վարչական շրջանները նույնպես պիտի առաջանցիկ տեմպերով զարգանան»:
Մանրամասները՝ տեսանյութերում:
Հռիփսիմե ՋԵԲԵՋՅԱՆ
