Ազգային ժողովի նիստում «Քաղաքացիական պայմանագիր» խմբակցության պատգամավոր Սիսակ Գաբրիելյանը դիմեց ԿԳՄՍ փոխնախարար Կարեն Գիլոյանին․ «Եկեք մտածենք, որ օր առաջ ունենանք առնվազն 30 հազար նստատեղ ունեցող ֆուտբոլային մարզադաշտ, որովհետեւ այսօր էլ ունենք ֆուտբոլ, եւ կարծում եմ՝ 30 հազարն այն թիվը չէ, որպեսզի մտածենք՝ ստադիոնում կլինեն երկրպագուներ, թե՞ ոչ»։
Կարեն Գիլոյանն ի պատասխան ասաց․ «Ինչ վերաբերում է ստադիոնին, դա հանապազօրյա խնդիր է։ Եվ Հայաստանի հավաքականի հպարտություն ներշնչող խաղի ֆոնին, այսօր այնպիսի պահանջարկ է առաջացել, որ հանրապետության կեսը ինձանից նեղացած է այս պահին, որ տոմս չեմ կարողանում տալ։ Խնդրեմ, պատգամավորներից մեկը՝ նույնպես։ Բայց ստադիոնի չափն է այդքան, այնտեղ չի լինում ավելին տեղավորել։ Հուսամ, որ, այո, այդպիսի ստադիոններ մենք կունենանք, եւ այդպիսի ստադիոնում կարձանագրվեն հայկական ֆուտբոլի նոր փառահեղ հաղթանակները»։
Կարեն Գիլոյանն իր խոսքում դիմեց նաեւ ԱԺ նիստին հետեւող աշակերտներին․ «Տրիբունայում նստած հարգելի աշակերտներ, ներողություն, յառուսում նստած, ասեմ, որ այսօր հաղթելու ենք, անպայման կերկրպագեք Հայաստանի հավաքականին»։
Կարեն Գիլոյանը ԱԺ նիստում ներկայացրեց նախագիծ, ըստ որի, հաշվի առնելով մարզակառույցների սղությունը, առաջարկվում է մասնավորեցման ցուցակից հանել եւ ԿԳՄՍ նախարարությանը հանձնել Ծիծեռնակաբերդի 5 հասցեում գտնվող մարզակառույցը։
Կարդացեք նաև
Ռոզա ՀՈՎՀԱՆՆԻՍՅԱՆ
