Ազգային ժողովի նիստում Պաշտպանության փոխնախարար Արման Սարգսյանը ներկայացրեց «Հայաստանի Հանրապետության եւ Չեխիայի Հանրապետության կառավարությունների միջեւ ռազմատեխնիկական համագործակցության մասին համաձայնագիրը վավերացնելու մասին» օրենքի նախագիծը։
«Համաձայնագրով սահմանվում են ռազմատեխնիկական բնագավառում համագործակցության ուղղությունները, որոնք ներառում են ռազմական նշանակության արտադրանքի արտադրության, ներմուծման, արտահանման, լիցենզավորման, որակի նկատմամբ հսկողության ապահովման, անհրաժեշտ մասնագետների եւ տեխնիկական անձնակազմի պատրաստման գործընթացը, ռազմատեխնիկական ոլորտում գործունեություն իրականացնող ընկերություններին աջակցության տրամադրումը, տեղեկությունների փոխանակման եւ պահպանման հետ կապված հարաբերությունները։ Համաձայնագրի դրույթների իրագործման նպատակով կողմերի լիազոր մարմիններ են հանդիսանալու Հայաստանի եւ Չեխիայի հանրապետությունների Պաշտպանության նախարարությունները»,- ասաց Արման Սարգսյանը։
Նշենք, որ Հայաստանն ու Չեխիան ռազմատեխնիկական համագործակցության մասին համաձայնագիրը ստորագրել էին դեռեւս 2019 թվականի ապրիլին։ Համաձայնագիրն ուժի մեջ է մտնում երկու երկրներում ներպետական ընթացակարգերն անցնելուց հետո։ Չեխիան 2019 թվականին Հայաստանին ծանուցել էր համաձայնագրի ներպետական ընթացակարգերի կատարման մասին։
Կարդացեք նաև
Ռոզա ՀՈՎՀԱՆՆԻՍՅԱՆ
