Հնդկաստանի մայրաքաղաք Նյու Դելիում ընթացող G20-ի գագաթնաժողովի իր ելույթում Արգենտինայի նախագահն անդրադարձել է Լաչինի միջանցքի ապօրինի շրջափակմանը։
Ալբերտո Ֆերնանդեսը նշել է. «Մինչ Արևելյան Եվրոպայում պատերազմ է ընթանում, բազմապատկվում են հասարակական նվազ ուշադրություն գրավող, բայց նույնքան ցավալի հակամարտությունները, ինչպես Ադրբեջանի կողմից Լաչինի միջանցքի շրջափակումն է, որը հանգեցրել է մարդասիրական ճգնաժամի, որի միտումն է ևս մեկ անգամ պատժել հայ ժողովրդին իր իսկ տարածքի մի մասում»։
Նախագահ Ֆերնանդեսը վերահաստատել է՝ բազմակողմանիությունն է միջազգային փոխըմբռնման գերագույն միջոցը։
Արգենտինայի առաջնորդի հայտարարությանը առնչությամ X-ի (նախկինում՝ Թվիթեր) իր միկրոբլոգում իսպաներեն գրառում է կատարել ՀՀ ԱԳ նախարար Արարատ Միրզոյանը։
Կարդացեք նաև
«Շնորհակալություն եմ հայտնում Ալբերտո Ֆերնանդեսին Նյու Դելիում G20–ի գագաթնաժողովում Ադրբեջանի կողմից Լաչինի միջանցքի արգելափակումը բարձրաձայնելու համար։ Մենք գնահատում ենք միջազգային գործընկերների ուղերձները, որոնց նպատակն է՝ վերականգնել Լաչինի միջանցքով անխափան տեղաշարժը»։
Պաշտոնական Բաքվից առայժմ չեն մեկնաբանել Արգենտինայի նախագահի անդրադարձը։
Արսեն ԱՅՎԱԶՅԱՆ
