Այսօր «Ապրելու երկիրը» կրկին Նուբարաշեն վարչական շրջանում էր՝ քարոզարշավի: Բնակիչներից մեկը հիասթափված էր բոլոր քաղաքական ուժերից, մոտեցավ կուսակցության նախագահ, քաղաքապետի թեկնածու Մանե Թանդիլյանին ու ասաց. «Որ ոչ թոշակ կա, ոչ աշխատավարձ կա, ի՞նչ ապրելու երկիր: Ներկա պահին քաղցկեղով հիվանդ ունեմ տունը, մի միլիոն ծախս ու հույս չունեմ»:
Մանե Թանդիլյանը պատասխանեց, որ սոցիալական հատուկ խմբերի համար պետք է մի շարք ծառայություններ անվճար լինեն. «Օրենքը թղթի վրա գրած է լինում, մենք պիտի կիրառել տանք, մայրիկ ջան: Պետք է փոխեք, որ հավատաք, պետք է գնաք ընտրության, չընտրեք նրանց, ովքեր ասել են՝ անվճար է լինելու ու չեն արել: Գնացեք ու փոխեք: Սա է ճանապարհը»:
Նուբարաշենցին ասում էր, որ միշտ հավատալով գնացել է ընտրատեղամաս, քվեարկել, բայց ոչ մի բան չի փոխվել:
Կարդացեք նաև
Թանդիլյանն արձագանքեց. «Ես ձեզ հետ համաձայն եմ: Դրա համար պետք է փոխել, այդ մարդիկ խաբել են: Մենք սոցիալական խմբերի համար բժշկական օգնությունը պետք է սուբսիդավորենք, որովհետեւ դուք չեք կարող մենակ մնալ այդ խնդիրների հետ»:
Բնակիչը պատմեց, որ ուր գնում է՝ վճարումներ են պահանջում. «Տալիս ենք հիվանդության թուղթը, հետն էլ ասումա՝ գնա էսքան մուծում արա: Ընկե՛ր ջան, աշխատավարձ չունեմ, ո՞նց մուծեմ, ուրեմն գնամ մեռնեմ: Մեռնելն էլ էժան չի»:
Մանե Թանդիլյանը հորդորեց ապրել՝ ապրելու երկրում:
Հռիփսիմե ՋԵԲԵՋՅԱՆ
