Ի՞նչ կարծիք ունեք Սամվել Շահրամանյանի մասին՝ որպես պետնախարար եւ Արցախի նախագահի թեկնածու: Արցախից ստանում ենք ահազանգեր, որ կան ուժեր, որոնք Սամվել Բաբայանի գլխավորությամբ՝ պատրաստվում են բոյկոտել ընտրությունները, բողոքի ցույցեր կազմակերպել, երբ ԱԺ-ն Շահրամանյանին ընտրի Արցախի նախագահ, դա թույլատրելի՞ է այսօրվա Արցախի իրավիճակում: Այսօր «Ապրելու երկիր» կուսակցության նախագահ, քաղաքապետի թեկնածու Մանե Թանդիլյանի եւ հասարակական-քաղաքական գործիչ, «Արցախի անվտանգության եւ զարգացման ճակատ» հանրային շարժման համակարգող Ռուբեն Վարդանյանի համատեղ մամուլի ասուլիսի ժամանակ այս հարցն ուղղեցին լրագրողները:
Ռուբեն Վարդանյանը պատասխանեց. «Շահրամանյանին ճանաչում եւ հարգում եմ որպես մարդ: Բոլոր մարդիկ, ովքեր հիմա գտնվում են Արցախում ու պատրաստ են Արցախը պահել հայկական, ընդունելի են մեզ համար: Մենք պարզ դիրքորոշում ունենք, հետեւողական պահում ենք՝ բոլոր այն ուժերը, որոնք ընդունում են գաղափարը, որ Արցախը չի կարող լինել Ադրբեջանի կազմում, մեզ համար ընդունելի են: Իսկ այն ուժերը, որոնք ուրիշ ճանապարհով են գնում, նրանց հետ չենք կարող համագործակցել, նրանք վտանգավոր դեր են խաղում: Ուզում եմ հասկանամ՝ ո՞նց կարելի է այսօրվա իրավիճակում, եթե պետության կողմից դու չունես մանդատ, դու գնաս, բանակցություններ վարես Ադրբեջանի կողմի հետ ու դրա համար պատիժ չստանաս: Դա անընդունելի է ոչ թե ճիշտ ու սխալ անելու համար, այլ անընդունելի է այս իրավիճակում նման բան անելը: Դրա համար մոտեցումը պետք է լինի հստակ՝ մենք ունենք հայրենական պատերազմ ու պետք է պատժել այն մարդկանց, որոնք այդ մոտեցմանը խանգարելու են»:
Հարցին՝ Ձեր եւ Նիկոլ Փաշինյանի միջեւ կա՞ շփում, երբ է այն դադարել՝ Ռուբեն Վարդանյանը պատասխանեց. «Վերջին անգամ եղել է նոյեմբեր ամսին՝ շատ կարճ, երբ որ ես պետնախարար եմ նշանակվել եւ ինձ ներկայացրել է Արայիկ Հարությունյանը, դա եղել է առաջին եւ վերջին շփումը: Չկա շփում անձնական ու գործնական»:
Հարցին՝ խոսում եք Բերձորի միջանցքի ապաշրջափակման մասին, հույս կա՞, թե՞ չկա՝ Ռուբեն Վարդանյանը պատասխանեց. «Դա լուրջ խնդիր է իսկապես: Լաչինի միջանցքը փակվել է, դա կարգավորվում էր նոյեմբերի 9-ի փաստաթղթով: Բոլորը խոսում են խաղաղության պայմանագրի մասին, բայց մինչ այդ ստորագրած թուղթը ոչ մի կողմը չի կատարում, անվստահություն են բերում մյուս թղթի հետ կապված: Եթե չի կատարվում, ի՞նչ կապ ունի՝ ինչ է ստորագրվել: Դրա համար մինչեւ նոր պայմանավորվածությունների գնալը պետք է հստակ դիրքորոշում լինի՝ ինչ է լինելու ապագան այն փաստաթղթի, որը ստորագրվել է նոյեմբերի 9-ին»:
Կարդացեք նաև
Ըստ Ռուբեն Վարդանյանի, Հայաստանի իշխանությունները տապալում են ամեն ինչ իրենց քաղաքականությամբ, որովհետեւ նախ պետք է հետ գա նոյեմբերի 9-ի կետերի իրականացմանը, ճնշում գործադրի, նոր միայն այլ պայմանավորվածությունների մասին խոսի:
Հարցին՝ Արցախում հացի հերթում չեն տեսնում կանգնող պաշտոնյաների, չկա՞ պաշտոնյաների համար հացի խնդիր՝ Ռուբեն Վարդանյանը պատասխանեց. «Օրինակ, ես գյուղում էի մնում եւ գյուղում ուրիշ իրավիճակ է, քան քաղաքում: Օրինակ, Մարտակերտի շրջանում տալոնները միանգամից էին մտցրել, ուղղակի Ստեփանակերտում, ցավոք, այդ միջոցն իրականացվեց ավելի ուշ: Բայց այս քանի օրը ես եկել եմ Ստեփանակերտ, հացը, որը լավ որակի չի, որովհետեւ ցորենի խնդիր կա, բայց դու կարող ես վերցնել առանց հերթի: Ցավալի, որ այդ աժիոտաժը ստեղծվել էր ու մարդիկ 6-8 ժամ հերթում էին կանգնում, բայց մենք բացել ենք երկու ճաշարան եւ կերակրում ենք աղքատ ընտանիքների մարդկանց, որոնք հնարավորություն չունեին հաց առնելու»:
Հռիփսիմե ՋԵԲԵՋՅԱՆ
Լուսանկարը՝ արխիվային
