Սեփական արարքների համար պետք է պատասխան տալ, ոչ թե անվերջ, ցանկացած առիթով մեղավորներ փնտրել: Այդ կերպ այսօր տեղի ունեցած ճեպազրույցում արձագանքել է Ռուսաստանի ԱԳՆ պաշտոնական ներկայացուցիչ Մարիա Զախարովան Հայաստանի վարչապետ Նիկոլ Փաշինյանի հայտարարությանն այն մասին, որ անվտանգության տեսանկյունից երկրի կախվածությունը միայն մեկ կենտրոնից ռազմավարական սխալ էր:
«Պետք է կրել սեփական պատասխանատվությունը և մեղքը չբարդել այլ մեկի վրա: Հենց դրանում է քաղաքական գործչի, պետական գործչի տարբերությունը երկրի շահերի մասին չմտածող մարդուց: Հակառակ դեպքում դա նմանվում է վատ պարողի մասին պատմությանը»,- ասել է Զախարովան:
Անդրադառնալով ԱԺ խոսնակ Ալեն Սիմոնյանի այն հայտարարությանը, որ Ադրբեջանի տարածքային ամբողջականությունն ընդունել է այն երկիրը, որը պետք է լիներ անվտանգության երաշխավորը, Զախարովան ասել է, որ «լպիրշության նմանվող» այդպիսի հռետորաբանությունը, «չի զարդարում» Հայաստանի քաղաքական գործիչներին:
«Եթե նրանք ցանկանում են խոսել փորձագիտական մակարդակում, քաղաքական մակարդակում, ապա դրա համար կան հնարավորություններ, կան հիանալի կապի խողովակներ Երևանի հետ՝ բոլոր ուղղություններով,- ասել է Զախարովան… Երբ մենք լսում ենք այդ հայտարարությունները Երևանի կողմից այն մասին, թե Ռուսաստանից ինչ-որ կախվածությունը հնարավորություն չի տալիս ապահովել անվտանգություն… Ամեն դեպքում մարդիկ, որոնք երկիր են ներկայացնում՛ պետք է պատասխանատու վերաբերվեն իրենց իսկ հայտարարություններին»:
Կարդացեք նաև
Նրա խոսքով՝ եթե Երևանում ցանկանում են վերաշարադրել պատմությունը, ապա դա նրանց չի հաջողվի: «Հայաստանի ժողովուրդն իր պատմությունը լավ գիտի՝ և՛ նորագույն, և՛ դարերի: Եվ գիտի Հայաստանի ժողովրդի ճակատագրում Ռուսաստանի դերի մասին»,- ասել է Զախարովան:
Պատրաստեց Վիկտորյա ԱՆԴՐԵԱՍՅԱՆԸ
