Հակակոռուպցիոն դատարանում դատավոր Նարինե Ավագյանի նախագահությամբ կայացավ նախկին ոստիկանապետ Վլադիմիր Գասպարյանի, Սուսաննա Գասպարյանի, Հեղուշ Գալստյանի, Անգելինա Գասպարյանի, Վլադիմիր Գասպարյանի, Անժելա Գասպարյանի, երրորդ անձ Աղասի Դանիելյանի՝ ապօրինի ծագում ունեցող գույքի բռնագանձման պահանջի մասին հերթական նիստը:
Վլադիմիր Գասպարյանի շահերի ներկայացուցիչ փաստաբան Վարազդատ Ասատրյանը Aravot.am-ին ասաց, որ այս նիստի ընթացքում հայցի հիմքի առարկայի պարզման շրջանակում պատասխանող կողմը շարունակեց հարցադրումներ ներկայացնել հայցվոր կողմին՝ փորձելով հասկանալ, թե դատախազությունը, ի վերջո, ինչպես է եկել այն եզրահանգման, որ պատասխանող կողմը չունի օրինական միջոցներ՝ որոշակի գույքային միավորներ ձեռք բերելու համար:
Այսօրվա նիստով հարցադրումների փուլն ավարտվեց: Հաջորդ դատական նիստում, որը նշանակվեց սեպտեմբերի 19-ին ժամը 15:30-ին, պատասխանող կողմը ներկայացնելու է իր առարկությունները:
Աշոտ ՀԱԿՈԲՅԱՆ
