Մոսկվան համաձայն չէ Հայաստանի վարչապետ Նիկոլ Փաշինյանի այն մեղադրանքներին, որ Ռուսաստանը պատրաստվում է դուրս գալ Հարավային Կովկասից: Նման հայտարարություն է արել Ռուսաստանի նախագահի խոսնակ Դմիտրի Պեսկովը լրագրողների հետ զրույցում:
«Պարոն վարչապետի այդ թեզերի հետ մենք չենք կարող համաձայնել: Ռուսաստանն այս տարածաշրջանի բացարձակապես անբաժան մասն է, այնպես որ ոչ մի տեղ գնալ չի կարող: Հայաստանից Ռուսաստանը գնալ չի կարող»,- ընդգծել է Պեսկովը:
Նա նշել է, որ Ռուսաստանում ավելի շատ հայ է ապրում, քան բուն Հայաստանում, նրանց մեծ մասը Ռուսաստանի «միանգամայն օրինակելի և հայրենասեր քաղաքացիներ են», որոնք իրենց ներդրումն են ունենում երկրի զարգացման գործում: Հետևաբար, Պեսկովի խոսքով՝ Ռուսաստանը կշարունակի Հարավային Կովկասի տարածաշրջանում, մասնավորապես Լեռնային Ղարաբաղում անվտանգության և կայունության երաշխավորի իր դերը: «Ռուսաստանը շարունակում է խաղալ հետևողական, շատ կարևոր դերակատարություն այս տարածաշրջանում իրավիճակի կայունացման և ապակոնֆլիկտացման գործում: Մենք կշարունակենք այդ դերը»,- ասել է Պեսկովը:
Նրա խոսքով՝ տվյալ դեպքում շատ կարևոր է տարածաշրջանի բոլոր համապատասխան պետությունների հավատարմությունը երկու տարվա վաղեմության եռակողմ հայտարարություններին: «Հենց այդ պայմանավորվածություններին հետևելն էլ հաջողության գրավականն է»,- ասել է Պեսկովը:
Կարդացեք նաև
Նա նշել է, որ դրանից հետո տեղի են ունեցել նաև նոր իրադարձություններ, որոնք «թեթևակի փոխել են իրավիճակը»: «Բայց դա չի նշանակում, որ Ռուսաստանը պատրաստվում է փոխել իր գործունեությունը: Ընդհակառակը, մենք կարծում ենք, որ Ռուսաստանը շարունակում է իրականացնել անվտանգության երաշխավորի իր դերը»:
Պեսկովը նաև հիշեցրել է Ռուսաստանի ներդրումը ինտեգրացիոն գործընթացներում, որոնց մաս է Հայաստանը: Նրա խոսքով՝ այդ ներդրումն է «գերազանցապես նպաստել այն բանին, որ անցյալ տարի Հայաստանը զարգացման տեմպերով առաջատար է դարձել ԱՊՀ-ում»: «Ուստի այդ ամբողջ աշխատանքը մենք կշարունակենք: Ոչ մի տեղ Ռուսաստանը չի գնում և չի պատրաստվում գնալ»,- ասել է նա:
Պեսկովը նաև ասել է, որ Ռուսաստանը հարգում է Հայաստանի վարչապետ Նիկոլ Փաշինյանին: «Մենք գնահատում ենք աշխատանքային և միանգամայն կառուցողական հարաբերությունները նրա և նախագահ Պուտինի միջև և հույս ունենք, որ այդ հարաբերությունները հետագայում էլ կմնան երկու երկրների սերտ գործակցության գրավական»,- ասել է Պեսկովը:
Պատրաստեց Վիկտորյա ԱՆԴՐԵԱՍՅԱՆԸ
