Այսօր «Ապրելու երկիր» կուսակցությունը նախընտրական քարոզարշավ իրականացրեց Ավան վարչական շրջանում: Լրագրողների հետ ճեպազրույցում հարցին՝ քանի ընտրությունների օրը մոտենում է, թեժանում է պայքարը եւ մենամարտի է արդեն վերածվում, որովհետեւ իշխանական թեկնածուն կոշտ հայտարարություններ արեց, թե քաղաքական թիմերի մեծ մասը խամաճիկներ են ու նրանք, ովքեր չունեն հենց Երեւանի հետ կապված օրակարգ, հատուկ քաոս են ստեղծում՝ կուսակցության նախագահ, քաղաքապետի թեկնածու Մանե Թանդիլյանը պատասխանեց. «Քաոս կա՞: Ես կարծում եմ, եթե կա մի ուժ, որը քաոս է ստեղծում, դա ՔՊ-ն է՝ իշխող ուժը: Ու քաոսն ամենուր է՝ ոչ միայն քաղաքում, այլեւ քաղաքական դաշտում: Տեսեք իրենց ֆեյքերի բանակը, ամենակայացած բանակը, որ գործում է ՀՀ-ում, դա ֆեյսբուքն է, մենք ապրում ենք ֆեյսբուքյան Հայաստանում եւ սեպտեմբերի 17-ից դա վերացնելու ենք, որովհետեւ իրականությունը տարբերվում է ֆեյսբուքից: Ինչ վերաբերում է մարտավարությանը, այն, որ իրենք բոլոր կարմիր գծերը հատել են, մարդկային, բարոյական արժեքներից զուրկ է իրենց ե՛ւ խոսույթը, ե՛ւ վարքագիծը։ Ինձ հետ այստեղ համակարծիք են բոլորը, մնում է այդ հարցին լուծում տալ սեպտեմբերի 17-ին: Սա է մեր անելիքը՝ գնալ եւ ազատել Երեւանը ՔՊ-ից»:
Մանե Թանդիլյանը նշեց, որ փողը գնում է այնտեղ, որտեղ կա թափանցիկություն, դրա համար ՔՊ-ի կառավարությունը չգիտի այն փողի տեղը, որը իրենք գիտեն՝ միջազգային դրամաշնորհներ, հիմնադրամներ:
Հարցին՝ Երեւանում հրատապ խնդիրներից է թափառող շների հարցը, ինչպե՞ս եք պատկերացնում լուծումը՝ Մանե Թանդիլյանը պատասխանեց. «Դուք ճիշտ եք, մարդիկ ահազանգում են թափառող շների, հատկապես՝ նրանց ագրեսիվ վարքագծի հետեւանքով պատճառված վնասի հարցով: Մեզ համար միանշանակ է, որ այդ հարցը պետք է լուծվի կարճ ժամկետում՝ 2-3 տարում, որովհետեւ երբ հարցը լուծում ես երկարաժամկետ՝ չի լուծվում, նրանք շարունակում են բազմանալ եւ ստերջացումը որակով չի արվում: 2 տարի ամբողջությամբ ստերջացման համար պետք է լինի եւ հանրային վայրերից շները հավաքվեն, տարվեն կացարաններ: Լինելու են կլինիկաներ: Մենք դրա փորձն ունենք Դիլիջանում: Երեւանը պիտի ազատվի թափառող շներից եւ ոհմակով շարժվող ագրեսիվ կենդանիներից»:
Կարդացեք նաև
Հռիփսիմե ՋԵԲԵՋՅԱՆ
