«Քաղաքացիական պայմանագիր» կուսակցության Երեւանի քաղաքապետի թեկնածու Տիգրան Ավինյանն այսօր լրագրողների հետ ճեպազրույցում անդրադարձավ նախկին քաղաքապետ, քաղաքապետի թեկնածու Հայկ Մարությանի հասցեին արված իր հայտարարությանը։
Հիշեցնենք, որ Ավինյանը Շենգավիթ վարչական շրջանում բնակչության հետ հանդիպման ժամանակ ասել էր․ «Պատերազմից հետո տեսավ, որ մեր վիճակը մի քիչ խարխուլ է, կարող է ծեծ ուտենք, փախավ։ Սա է փաստը, այլ սուտ արդարացումներ պետք չեն»։
Այսօր լրագրողների դիտարկմանը, որ Հայկ Մարությանը հերքել է, թե փախել է, Տիգրան Ավինյանը պատասխանեց․ «Փախել է։ Ես ասում եմ՝ պատերազմից հետո, երբ կառավարության շենք մտնում էին ինչ-որ խուլիգաններ, երբ Ազգային ժողովի շենք մտնում էին ինչ-որ խուլիգաններ, ես զբաղված էի էդ ամեն ինչը կանխելով։ Հիմա ասում եմ, ժողովուրդ ջան, հենց դա է տեղի ունեցել, զբաղված եմ եղել այդ ամեն ինչը կանխելով, որ հակաժողովրդական ուժերը, խուլիգաններն այս երկրին տեր չդառնան եւ 2018 թվականի հեղափոխությամբ մեր ձեռք բերած իրավունքները՝ ժողովրդավարական ու ազատ ընտրություններ ունենալու, որեւէ մեկը չկարողանա մեզանից խլել։ Իսկ ով որ վախեցավ էդ պրոցեսում, սիրտը չգիտեմ ուր փախավ, ինքը գիտի՝ ոնց է փախել, երբ ժամանակը գա, դրա մասին էլ կխոսենք»։
Կարդացեք նաև
Ռոզա ՀՈՎՀԱՆՆԻՍՅԱՆ
Լուսանկարը՝ արխիվային
