Լաչինի միջանցքը համաձայնեցվել է որպես Հայաստանի և Լեռնային Ղարաբաղի միջև կապող օղակ և չունի այլընտրանք, «Ազատության» հարցմանն ի պատասխան հայտարարել է Հայաստանի արտգործնախարարությունը:
«Ազատությունը», մասնավորապես, հետաքրքրվել էր արտաքին քաղաքական գերատեսչությունից, թե արդյո՞ք Լաչինի միջանցքը բացելու Բաքվի նախապայմանը Ադրբեջանը դարձրե՞լ է Աղդամի ճանապարհի բացումը։
Հայաստանի արտաքին քաղաքական գերատեսչությունը շեշտել է՝ Լաչինի միջանցքը պետք է բացվի, իսկ ինչ վերաբերում է այլ հնարավոր հաղորդակցություններին, դա պետք է լուծվի Բաքու-Ստեփանակերտ երկխոսության միջազգային մեխանիզմի շրջանակներում։
«Ազատության» մեկ այլ հարցին, թե հաշվի առնելով Ստեփանակերտի բացասական վերաբերմունքը Աղդամով օգնություն ստանալուն՝ ՄԱԿ-ի Անվտանգության խորհրդում կա՞ որևէ անդամ երկիր, որ պատրաստ է Լաչինի հարցով բանաձևի նախագիծ ներկայացնել, առաջիկայում տեսանելի՞ է այդ հեռանկարը, արտգործնախարարությունը, վկայակոչելով օգոստոսի 16-ին կայացած ՄԱԿ-ի ԱԽ հրատապ նիստը, պատասխանել է՝ այդ հանդիպման ընթացքում Լաչինի միջանցքի գործունեության վերականգնման, ՄԱԿ-ի Արդարադատության միջազգային դատարանի որոշումների իրականացման և նոյեմբերի 9-ի հայտարարության կետերի պահպանման անհրաժեշտության վերաբերյալ հստակ դիրքորոշում է հայտնել ՄԱԿ-ի ԱԽ անդամ երկրների ծանրակշիռ մեծամասնությունը։ Եղել են երկրներ, որ նաև հստակ ընդգծել են, որ Աղամի ճանապարհը չի կարող այլընտրանք լինել Լաչինի միջանցքին։
Կարդացեք նաև
«Այս հարցի շուրջ Հայաստանի դիրքորոշումը չի փոխվել և միջազգային մեր գործընկերների հետ աշխատանքները շարունակվում են՝ ուղղված Ադրբեջանի կողմից արդարադատության միջազգային դատարանի համապատասխան որոշումների կատարմանը և ԼՂ ապօրինի շրջափակման վերացմանը, այդ թվում՝ գործադրելով ՄԱԿ-ի և ՄԱԿ Անվտանգության խորհրդի համապատասխան մեխանիզմները», – ասված է պատասխանում։
Նյութն ամբողջությամբ՝ սկզբնաղբյուր կայքում:
