Այդ կազմակերպության հրապարակած արդյունքները կարողացել ենք գնահատել դեռևս 2008 թվականին և դրա պատասխանը լավագույնս տվել է Լևոն Տեր-Պետրոսյանը, որին նրանք չեն հակադարձել: Լևոն Տեր-Պետրոսյանն ասաց «թող ուտեն իրենց հրապարակած թվերը»:
Aravot.am-ին նման պատասխան տվեց «Հանրապետություն» կուսակցության Երևանի քաղաքապետի թեկնածու Արտակ Զեյնալյանը, երբ նրան խնդրեցինք մեկնաբանել «GALLUP International Association»-ը հրապարակած հարցման արդյունքները, համաձայն որի Երևանի բնակիչների շրջանում հարցված 805 քաղաքացիներից 3.0%-ն է միայն պատրաստվում քվեարկել «Հանրապետություն» կուսակցության և Արտակ Զեյնալյանի օգտին:
«Իրենք Լևոն Տեր-Պետրոսյանի համար կանխատեսել էին 4 տոկոս, ու նույնիսկ Ռոբերտ Քոչարյանի և Սերժ Սարգսյանի ռեժիմների աննախադեպ կեղծումներից հետո, ռեժիմի ներկայացուցիչները Լևոն Տեր-Պետրոսյանի համար տասնապատիկ անգամ ավելի շատ ցուցանիշ ցույց տվեցին: Այնպես որ նրանց այդ տվյալները որակազրկված են 2008 թվականի ընտրություններով և դրանից հետո նրանք չեն վերականգնել իրենց հեղինակությունն ու համբավը»,-ասաց Արտակ Զեյնալյանը: Հիմա, երբ վաղուց Ռոբերտ Քոչարյանն ու Սերժ Սարգսյանը իշխանության չեն՝ դուք նորից կրկնու՞մ եք Լևոն Տեր-Պետրոսյանին, իմ ճշտող հարցը զայրացրեց Զեյնալյանին. «Ես ձեր տեսակետների հետ համաձայն չեմ, ես չեմ կիսում ձեր տեսակետը», թեպետ ես առհասարակ տեսակետ չէի հայտնել ու ընդամենը ճշտող հարց էի տվել:
Իմ հաջորդ «Լուրեր են շրջանառվում, թե ընտրությունների արդյունքում ՔՊ-ն, «Հանրապետություն» և , «Լուսավոր Հայաստան» կուսակցությունները կոալիցիա են կազմելու, որքանո՞վ են իրատեսական այս լուրերը՝ մանավանդ որ ձեր կուսակցության առաջնորդը միակ մրցակից տեսնում է ՔՊ-ին: Առհասարակ որևէ ուժի հետ կոալիցիա կկազմե՞ք» հարցը Արտակ Զեյնալյանի կողմից «պրովոկացիա» որակմանն արժանացավ:
Կարդացեք նաև
«Պրովոկցիոն հարցեր են, ես հասկանում եմ , հարկավոր է պրովոկացիան պոկելու համար անել այն ինչ անհրաժեշտ է, բայց մենք դրա պատասխանը տվել ենք, մեր մրցակիցը, քաղաքական հակառակորդը այսօրվա իշխող քաղաքական մեծամասնությունն է, որ տիրապետում է ավագանու մեծամասնությանն ու քաղաքի կառավարման ղեկին: Երբ ժողովուրդը կորոշի, թե ով է լինելու ավագանու անդամ, և եթե մեծամասնությունը մենք լինենք, կարծում եմ մեզ հետ բոլորը կհամագործակցեն»,-ասաց «Հանրապետության» քաղաքապետը:
Նրանից փորձեցինք ճշտել նաև քարոզչության 10-րդ օրը, իր տպավորությամբ երևանցիները Կազանի՞, թե Միլանի օգտին են, ընտրություն կատարելու: «Ինտելեկտուալ երևանցին ընտրություն է կատարելու Միլանի օգտին, իսկ այդպիսիք բավականին շատ են»-ասաց նա:
Լուսինե ՄԱՐԳԱՐՅԱՆ
