Խնկո Ապոր անվան ազգային մանկական գրադարանում ավարտվեց հունիսի 1-ից մեկնարկած ամառային դպրոցը: Ամռան երեք ամիսների ընթացքում աշխարհի տարբեր երկրներից (Ռուսաստան, ԱՄՆ, Կանադա, Բելգիա, Շվեյցարիա և այլն) հայ և օտարազգի շուրջ 80 երեխա մասնակից դարձավ գրադարանի կողմից կազմակերպված կրթամշակութային, ճանաչողական, ժամանցային այցերին ու միջոցառումներին:
Գրադարանում երեխաները մասնակցել են գրքի ընթերցումների ու քննարկումների, սովորել ասեղնագործել ու շախմատ խաղալ, կատարել ամառային հանձնարարությունները, խորացրել օտար լեզուների իմացությունն ու նոր գիտելիքներ ձեռք բերել «Ես և շրջակա միջավայրը», «Հայտնագործության պատմություններ», «Հայրենագիտություն», «Աշխարհի շուրջ» խորագրերով թեմատիկ զրույցների շնորհիվ: Երեխաների առօրյայում կարևոր տեղ է հատկացվել առողջ ապրելակերպին՝ օրը նախավարժանքով սկսելու ու բակային խաղերով դասընթացներն ընդմիջելու միջոցով:
Երեխաների համար կազմակերպվել են նաև ինտերակտիվ խաղեր, մուլտֆիլմերի դիտումներ ու հեքիաթատապատումներ, արվեստի ժամին մատուցվել են թատրոնի ու երաժշտության պատմության մասին տեղեկություններ:
Ամառային դպրոցի սաներն ունեցել են նաև արտագրադարանային այցելություններ՝ Խամաճիկների պետական թատրոն, Լուսիկ Ագուլեցու տուն-թանգարան, Մատենադարան ու «Մուլտարտ» անիմացիոն ստուդիա:
Կարդացեք նաև
Խնկո Ապոր անվան ազգային մանկական գրադարանը շնորհավորում է բոլոր դպրոցականներին և ուսուցիչներին Գիտելիքի տոնի առթիվ՝ մաղթելով բեղմնավոր ուսումնական տարի:
Խնկո Ապոր անվան ազգային մանկական գրադարան
