«Զվարթնոց» օդանավակայանը հայ ճարտարապետական մտքի բարձունքներից մեկն է: Հայ ճարտարապետները, այդ թվում՝ Արթուր Թարխանյանը օդանավակայանը կառուցել էին այնպես, որ ամեն դետալ օգտագործվեր, միաժամանակ հիացներ բոլորին: Ուստի «Ապրելու երկիր» կուսակցությունը հանձնառություն է ստանձնել վերակառուցել այդ հրաշալի շենքը՝ համագործակցելով «Արթուր Թարխանյան կենտրոնի» հետ:
Այսօր այդ մեգանախագծի քննարկման ժամանակ կուսակցության նախագահ, Երեւանի քաղաքապետի թեկնածու Մանե Թանդիլյանն ասաց. «Մենք հանձնառու ենք որակ բերել մեր աշխատանքին Երեւանի քաղաքապետարանում սեպտեմբերի 18-ից: Ես ցավով արձանագրում եմ, որ վերջերս «Զվարթնոցի» մասին հիշելիս պարբերաբար խոսվում է 2013, 2916, 2018 թվականներին դրա քանդման մասին: Այսինքն, առիթը, որով հիշատակվում է օդանավակայանը, անընդհատ այն մասին է, որ պիտի քննարկվի քանդվելու գործընթացը: Երեւանցիները ամեն օր պայքարել են, որ «Զվարթնոցը» կանգուն մնա: Սա լավ արձանագրում է այն մասին, որ մենք անտարբեր չենք «Զվարթնոցի» հանդեպ, բայց միեւնույն ժամանակ սա արձանագրում է այն մասին, թե ինչու ենք մենք անընդհատ գնում քանդելու ճանապարհով: Սա ճանապարհ չէ: Ու հատկապես ճանապարհ չէ, երբ խոսքը վերաբերվում է պատմամշակութային արժեքներին: Ցուցակում կա, թե չկա ամենեւին կապ չունի: Հարցրեք յուրաքանչյուր երեւանցու, յուրաքանչյուր հայի եւ կիմանաք, որ սա արժեք է»:
Մանե Թանդիլյանը նշեց, որ ըստ ուսումնասիրությունների, Երեւանը տարվա կտրվածքով ընդունում է մոտ 3 մլն ուղեւոր: «Զվարթնոցի» վերականգնումն ու վերակառուցումը կընդլայնի այդ հնարավորությունը՝ հասցնելով մինչեւ 12 մլն-ի «Սա նշանակում է դարձնել ներդրումն ու գործունեությունը ծախսարդյունավետ, որն իր հետ նվազեցնելու է տոմսերի գինը դեպի Հայաստան եւ Հայաստանից: Իսկ սա նշանակում է զբոսաշրջության, պետության զարգացում, ներդրումների ներհոսք»:
Կարդացեք նաև
Թանդիլյանը հայտարարեց՝ այսպես անփութորեն վերաբերվել մեր ճարտարապետական գլուխգործոցներին այլեւս չենք հանդուրժելու, թույլ չենք տալու. «Երեւանցին չպետք է ստիպված լինի ամեն օր դուրս գա փողոց պայքարի, որպեսզի «Զվարթնոցը» պահպանվի ու պաշտպանվի: Ասում են, թե պիտի քանդել, որովհետեւ վթարային վիճակում է: Վթարային վիճակում գտնվող շենքն ամրապնդվում է: Դրանք չեն բերում հասցվում վթարային վիճակի՝ չխնամելով: Մենք պիտի պաշտպանենք մեր անցյալը, մեր արժեքները, որովհետեւ մենք պատմություն ունեցող ժողովուրդ ենք, քաղաք ենք: Պիտի մեր ինքնությունը պաշտպանենք, որպեսզի շարունակություն ունենանք, որովհետեւ նա, ով հիշողություն չունի, դատապարտված է կործանման»:
Հռիփսիմե ՋԵԲԵՋՅԱՆ
