UWC Դիլիջանում նոր ուսումնական տարին խոստանում է առանձնահատուկ լինել մի քանի պատճառով:
UWC Դիլիջանի համերաշխ համայնքի համար այս օրը հատուկ օր է, քանի որ դիմավորում ենք մեր նոր 111 ուսանողներին: Նրանք երկու տարի շարունակ ապրելու և ուսանելու են գեղատեսիլ Դիլիջան քաղաքում, որտեղ վերջին տարիներին յուրահատուկ միջավայր է ձևավորվել: Աշխարհի 56 երկրներից երիտասարդ, այդ թվում՝ 9 ուսանող Հայաստանից, 3 ուսանող Լեռնային Ղարաբաղից, անհամբեր սպասում էին UWC Դիլիջանի առաջարկած նոր հնարավորություններին և փորձառությանը։
Տարբեր երկրներից, տարբեր կրոնական և էթնիկ պատկանելություն և սոցիալ-տնտեսական ծագում ունեցող ներկայացուցիչներից կազմված դպրոցական համայնքը UWC կրթության հիմնաքարն է: UWC Դիլիջանի երկամյա միջազգային բակալավրիատի ծրագրում ներառված են ընդհանուր առմամբ 220 ուսանող 72 երկրից: Շատ ուսանողներ հնարավորություն են ստանում սովորելու UWC Դիլիջանում մասնավոր բարերարների և կազմակերպությունների առատաձեռն հովանավորության շնորհիվ: Ուսանողների շուրջ 75%-ը կրթաթոշակ է ստանում, այդ թվում՝ 35%-ը՝ լրիվ, 40%-ը՝ մասնակի կրթաթոշակով:
Այս տարին հատուկ է նրանով, որ առաջին անգամ UWC Դիլիջանի երկու շրջանավարտ միացավ մեր դասախոսական կազմին: Ժամանակին Լիբանանում ապաստան գտած սուդանցի փախստական Նուր Մուսսան, ավարտելով մեր դպրոցը, մաթեմատիկայի բակալավրի աստիճան է ձեռք բերել Նյու Յորքի Ռոչեսթերի համալսարանում և այժմ միացել է մեր համայնքին որպես մաթեմատիկայի ուսուցչի օգնական:
Իսկ UWC Դիլիջանի 2018 թ. շրջանավարտ և մեր համայնքի ակտիվ անդամ, ուրուգվայցի Պաուլա Լեգուիսամոն, փիլիսոփայության բակալավրի աստիճան ստանալով իր հայրենի երկրում, վերադարձել է UWC Դիլիջան՝ որպես փիլիսոփայության ուսուցչի օգնական: Պաուլան նշում է. «Ես խորապես հավատում եմ, որ կրթությունը մշակույթների միջև կապը խթանող և կայուն ապագա ստեղծող ուժ է: Այդուհանդերձ, նաև գտնում եմ, որ դրան կարելի է հասնել միայն եթե կրթությունը հասանելի լինի բոլորին: Հենց այս համոզմունքով եմ առաջնորդվում և այս համոզմունքի վրա եմ սկսել կառուցել իմ աշխատանքային գործունեությունը»:
Կարդացեք նաև
Մեր անձնակազմի նոր անդամների շարքում դիմավորեցինք նաև UWC Դիլիջանի նոր տնօրեն Ադամ Արմանսկիին։ Ադամը, ով ծագումով լեհ է, ունի դասավանդման մեծ փորձ տարբեր երկրներում՝ այդ թվում իր հայրենի Լեհաստանում, ինչպես նաև Չինաստանում, Ղազախստանում, Շվեյցարիայում, Թուրքիայում:Նորվեգիայում Գյովիկռեգիոնենի միջազգային դպրոցի հիմնադիր տնօրենն է և պաշտոնավարել է շուրջ ութ տարի: Ադամի աշխատանքային փորձը հիմնականում ընթացել է միջազգային բակալավրիատ ծրագրով գործող դպրոցներում, ինչպիսին է նաև UWC Դիլիջանը: Բացի լեհերենից Ադամը տիրապետում է նաև անգլերենին, գերմաներենին և ռուսերենին: Առաջին անգամ դպրոցի տնօրեն է նշանակվել մի անձ,ով քաջ ծանոթ է տարածաշրջանին և հետխորհրդային տարածքին:
2023 թ. UWC Դիլիջանն ավարտած 103 ուսանողների առաջադիմությունը ևս մեկ կարևոր արձանագրում է: Միջազգային բակալավրիատի քննությունները հաջողությամբ հանձնել են մեր ուսանողների 96%-ը: Նշենք, որ 2022 թ. աշխարհի միջին ցուցանիշը կազմել է 79%: Ընդ որում մեր շրջանավարտների 15% քննությունների արդյունքում հավաքել է 40 և ավելի միավոր (2022 թ. միջազգային միջին ցուցանիշը կազմել է 8.6%): Ուսանողների 48% ստացել են երկլեզու դիպլոմ (2022 թ. միջազգային միջին ցուցանիշը կազմել է 27%):
Համալսարանական ընդունելության արդյունքները նույնպես բարձր են: 2023թ. 103 շրջանավարտներից 21-ը մեկ տարի դադար են վերցրել, իսկ մյուսներն անմիջապես շարունակել են կրթությունը համալսարաններում։
Մեր շրջանավարտներին ընդունած համալսարանների աշխարհագրական բաշխվածությունը հետևյալն է՝
ԱՄՆ 56%
Նիդեռլանդներ 9%
Կանադա 4%
Ավստրիա 2%
Գերմանիա 2%
Ֆրանսիա 2%
Հոնկոնգ 1%
Մեր ուսանողներն ընդունվել են այնպիսի համալսարաններ, ինչպիսիք են.
- ԱՄՆ-ում՝ Բրաուն, Կոռնել, Չիկագոյի համալսարան, Հյուսիսարևմտյան համալսարան, Միդլբերի Քոլեջ,
- Կանադայում՝ ՄակԳիլ, Բրիտանական Կոլումբիայի համալսարան, Տորոնտոյի համալսարան,
- Մեծ Բրիտանիայում՝ Լոնդոնի կայսերական քոլեջ, Լոնդոնի համալսարանական քոլեջ, Լոնդոնի թագավորական քոլեջ, Էդինբուրգի համալսարան, Սենտ Էնդրյու,
- Նիդեռլանդներում՝ Ամստերդամի համալսարան, Ուտրեխտի համալսարան, Էրազմուս համալսարանական քոլեջ, TU Delft,
- Ֆրանսիայում՝ Սիանս Պո, Նանտերի համալսարան Փարիզ,
- Գերմանիայում՝ Բեռլինի Բարդ քոլեջ:
Այս տարին նշանավորվում է մեր դպրոցի 10-րդ հոբելյանի մեկնարկով: 2024թ. հոկտեմբերին նշվելիք տարեդարձի առթիվ նոր ուսումնական տարին մեկնարկում ենք հատուկ միջոցառումների ծրագրով:
Տնօրենի պաշտոնը ստանձնելու առթիվ UWC Դիլիջանի տնօրեն Ադամ Արմանսկին նշեց. «UWC Դիլիջանն ամուր հիմքերի վրա է, և այս ուսումնական տարում ևս վստահաբար ամեն ինչ անելու ենք, որպեսզի շարունակենք ամրապնդել առաջին տասնամյակում գրանցած հաջողությունները: Ինչ վերաբերում է ինձ, ապա շատ եմ լսել հայ ժողովրդի հյուրընկալության ու ջերմության մասին, ուստի անհամբեր եմ, որ առավել մոտիկից ճանաչեմ այս հրաշալի երկիրը, և իհարկե կրթության միջոցով նպաստեմ նրա զարգացմանը»:
Փաթիլ Վարդանեան
UWC Դիլիջանը տարածաշրջանի առաջին միջազգային դպրոց պանսիոնն է, որը գործում է UWC կրթական մոդելով։ Դպրոցն իր դռները բացել է 2014 թվականին Հայաստանի Դիլիջան քաղաքում: Դպրոցն ունի 220 ուսանող աշխարհի 72 երկրից և 84 աշխատող 16 երկրից։
UWC Դիլիջանը UWC շարժման մաս է կազմում, որի կազմում ներառված են 18 միջազգային դպրոցներ և քոլեջներ և ազգային կոմիտեներ շուրջ 160 երկրում:
UWC Դիլիջանի ստեղծման գաղափարը պատկանում է հանրօգուտ ներդրողներ և սոցիալական ձեռներեցներ Ռուբեն Վարդանյանին և Վերոնիկա Զոնաբենդին, որոնք այն կյանքի են կոչել այլ հիմնադիր նվիրատուների աջակցությամբ: Քոլեջը կառուցվել է ավելի քան 330 բարերարի առատաձեռն նվիրատվությունների շնորհիվ: Քոլեջի ընդունելության քաղաքականությունը հիմնված է ֆինանսական աջակցության կարիքի վրա և թույլ է տալիս դիմելու բոլորին՝ անկախ սոցիալ-տնտեսական կացությունից։ Ուսանողների ավելի քան 70% ստանում է լրիվ կամ մասնակի կրթաթոշակ։
UWC Դիլիջանում դասավանդվում է Միջազգային բակալավրիատի դիպլոմի (International Baccalaureate, IB) ծրագրով, որը գնահատվող ծրագիր է՝ նախատեսված 16-19 տարեկան երեխաների համար:
UWC Դիլիջանն ունի ավելի քան 800 ուսանող:
UWC Դիլիջան
