Արմավիրի մարզի Խանջյան գյուղի մոտ գտնվող նորահայտ ամրոցում իրականացվող հնագիտական աշխատանքներն ավարտվել են, իրականացվել է պեղումներին հաջորդող ամենակարևոր մասը՝ պահպանությունը։ Աշտարակի հիմքերը, բացված պատերը ծածկվել են, ժամանակավոր ամրակայվել է մինչև հաջորդ պեղաշրջան։
«Պահպանության ծառայություն» ՊՈԱԿ-ի արշավախումբը գերմանացի հնագետների հետ համատեղ օգոստոս ամսվա ընթացում պեղումներ են իրականացրել «Խանջյան» ամրոց-բնակատեղիի տարածքում (հայկական արշավախմբի ղեկավար Լ․ Մկրտչյան, գերմանական արշավախմբի ղեկավար Ս․Առնոլդ)։
Պեղման աշխատանքները կենտրոնացել էին ամրոցի վերնամասում, որտեղ նշմարվում էր քառանկյուն հիմքով կառույց։
Աշտարակի արտաքին պատերի ուսումնասիրության արդյունքում Լևոն Մկրտչյանի գնահատմամբ, բացվել է հնագիտական հետաքրքիր իրավիճակ՝ այրված շերտ, մեծ ու հաստ իրանով կոտրած խեցանոթոների սփռվածությամբ։
Լևոն Մկրտչյան արշավախմբի ղեկավար.
Առաջին տարվա համար շատ մեծ արդյունքներ եղան․ նախ բացվեց մի ամբողջական մոնումենտալ կառույց՝ տեղ-տեղ մինչև 2 մ պահպանվածությամբ հոծ ուղղանկյուն աշտարակ։ Այն ուղեկցվում էր հնագիտական հստակ շերտով և իրավիճակով։
Կարդացեք նաև
Աշտարակի արևմտյան մասում մոտ 1 մ խորությունից բացվել էր այրված շերտ՝ փայտածուխի վառված ոսկորների մնացորդներով, ողջ շերտը ծածկված էր հավանաբար երկու տարբեր հաստության խոշոր կարասների ջարդած բեկորներով։
Ուշագրավ է կարասների իրաններին առկա գայլիկոնացված անցքերը, հավանաբար գործ ունենք ծիսական առարկայի հետ։
Նախնական ուսումնասիրությամբ աշտարակը թվագրվում է մ․թ․ա․ VII-V դդ., իսկ առվել ստույգ, թե որ ժամանակշրջանն է ընդգրկում ամրոցը, կպարզվի Գերմանիայում՝ ռադիոածխածնային հետազոտության արդյունքում։
Պատմամշակութային արգելոց-թանգարանների
և պատմական միջավայրի պահպանության ծառայություն
