«Արցախ հանձնելու մանդատ չունես», «Հռչակագիր փոխելու մանդատ չունես, «Բանակ քանդելու մանդատ չունես», «Երկիր քանդելու մանդատ չունես». այս եւ համանման այլ պաստառներով ու կոչերով, այսօր ՀՀ ԿԸՀ-ի մոտ, «Բաբոն տեր ա» նախաձեռնության անդամները միացան «ՀայաՔվե» նախաձեռնությանը:
Լուսանկարը՝ «Բաբոն տեր ա» նախաձեռնության ֆեյսբուքյան էջից
Հիշեցնենք, նախաձեռնության հեղինակներն այսօր 58 հազար ստորագրությունները՝ հինգ արկղերի մեջ զետեղված, հանձնեցին ԿԸՀ:
ԿԸՀ քարտուղար Արմեն Սմբատյանը և նախաձեռնության մի քանի անդամ ստորագրեցին արկղերը։
‘Hayakve’ initiative handed over the collected 58 thousand signatures to the Central Electoral Commission in Yerevan, Armenia
«Սեպտեմբերի 4-ին արկղերը կբացվեն ու կսկսվի ստորագրությունների ստուգումը։ Հատուկ ծրագիր է պատվիրել ԿԸՀ- ն՝ ստորագրությունները ստուգելու համար։ Միակ խնդիրը կարող է լինել այն, որ ծրագիրը վերջնական պատրաստ չլինի, հակառակ դեպքում, եթե խնդիր չլինի, երկուշաբթի ժամը 11։00-ին կսկսվի ստուգումը»,- ասաց Արմեն Սմբատյանը՝ ընդգծելով, որ նախաձեռնության առնվազն երկու ներկայացուցիչ կարող է ներկա լինել այն սրահում, որտեղ իրականացվելու է ստորագրահավաքի ստուգման գործառույթը։
Կարդացեք նաև
Նախաձեռնության հեղինակ Ավետիք Չալաբյանը հայտարարեց, որ սխալի հավանականությունը 0,5 տոկոս է. իրենք ստուգել են բոլոր ստորագրությունները, նույնականացրել փաստաթղթերը, դրանք էլեկտրոնային տարբերակով պահվում են նախաձեռնության հեղինակների մոտ: Ավետիք Չալաբյանը նաեւ հայտարարեց, որ իրենք պայքարելու են յուրաքանչյուր ստորագրության համար, բայց եւ քաղաքացիներին կոչ արեց՝ նաեւ անձամբ պայքարել իրենց ստորագրությունների համար, մասնավորաբար, հարցի խորհրդարանական քննարկումների շրջանում, ԱԺ-ի մոտ հավաքվել եւ անել ամեն ինչ, որպեսզի օրենքը անցնի հենց խորհրդարանում եւ առաջին փուլով. «Մենք այս իշխանություններին վերջին հնարավորությունն ենք տալիս, այլապես, ժողովրդի գետը կմաքրի այս իշխանությանը»:
Հիշեցնենք, որ «Հայաքվե»-ն քաղաքացիական-օրենսդրական նախաձեռնություն է, որն առաջարկում է քրեականացնել Հայաստանի Հանրապետության անունից Արցախն այլ պետության մաս ճանաչող ցանկացած գործողություն:
Նախագծում կա ևս մեկ կետ՝ Հայոց ցեղասպանության նշանակությունը նսեմացնող գործողությունների քրեականացում:
Եթե ազգային ժողովը անտեսի ժողովրդի կամքը և մերժի նախագիծը, ապա ևս 300 հազար ստորագրություն կհավաքվի եւ այս նախագիծը կդրվի հանրաքվեի:
Հանրաքվեով բավարար ձայներ ստանալու դեպքում նախագիծը անմիջապես հրապարակվում ու դառնում է օրենք: Հետագայում այն կարող է փոխվել միայն հանրաքվեով:
Նելլի ԳՐԻԳՈՐՅԱՆ
