Համաշխարհային բանկը հրապարակել է «Հայաստանի ամսական տնտեսական զարգացումներ 2023» ամփոփագիրը, ըստ որի հունիսին տնտեսական ակտիվության ինդեքսի աճի տեմպը կիսով չափ նվազել է` իրական արտահայտությամբ հասնելով 6.8 %-ի՝ մայիսի 13.6%-ի համեմատ։
Սա, ըստ Համաշխարհային բանկի վերլուծության, պայմանավորված է եղել ոչ առեւտրային ծառայությունների աճի տեմպի դանդաղմամբ՝ մայիսի 12.3%-ի համեմատ հունիսին հասել է 4%-ի։
Նույն վերլուծության համաձայն՝ արդյունաբերության ծավալների կրճատումը տնտեսական ակտիվության աճի տեմպի դանդաղման պատճառներից մեկն է` հիմնականում հանքարդյունաբերության ոլորտի ծավալների 15.6% նվազմամբ:
Ի տարբերություն հանքարդյունաբերության, շինարարության եւ առեւտրի ոլորտները շարունակել են կայուն աճել` համապատասխանաբար 18 եւ 20%-ով։
Կարդացեք նաև
Այս տարվա 1-ին եռամսյակում գյուղատնտեսության ոլորտում գրանցվել է 2% աճ, ինչը պայմանավորված է այգեգործության ոլորտի վերականգնմամբ, իսկ անասնապահության եւ ձկնաբուծության ծավալները կրճատվել են:
Հունիսին, ըստ ՀԲ-ի, Ռուսաստանից դրամական զուտ փոխանցումները 33%-ով պակաս են եղել 2022 թվականի հունիսի փոխանցումներից, բայց երեք անգամ գերազանցել են 2021 թվականի հունիսի ցուցանիշը: 2023 թվականի հունիսին դրամական փոխանցումները, զուտ արտահայտությամբ, կազմել են 130 միլիոն դոլար, ինչը 2.7 անգամ գերազանցում է մայիսի ցուցանիշը, բայց 15%-ով ցածր է անցած հինգ ամիսների միջինից: Դրամական փոխանցումների ներհոսքերում ու արտահոսքերում նկատվում են զգալի տատանումներ։
