«Դա ինդուստրիա է, շատ փողեր բերող, շատ գաղտնի եւ շատ բարձր հովանավորության ներքո, այնպես որ, որ օրը ուզել են, այն օրը տարածել են այդ տեսանյութը, ինչ ցանկացել՝ արել են: Հետեւաբար պետք չէ ընկնել հիստերիայի մեջ: Նույնն էլ տրանսգենդերին դանակահարելուն է վերաբերվում: Դա այնքանով է ողբերգական, ինչքան ցանկացած մարդուն դանակահարելը, դա քրեական գործ է: Եվ դա բերել-մտցնել կոնվենցիաների տակ, նշանակում է հասարակությանը հավկուրի ու տգետի տեղ դնել»,-«Հայելի» ակումբում ասաց ռեժիսոր Հովհաննես Գալստյանը՝ անդրադառնալով մանկահասակ աղջկա դեմ մոր կողմից իրականացված գործողություններին, տրանդսգենդերի դանակահարությանը եւ նման դեպքերը անհարկի հնչեղ դարձնելու միտումներին:
Ինչ վերաբերվում է Նիկոլ Փաշինյանի՝ Սյունիք այցելելուն, ռեժիսորն ասաց, որ նրա այցի բոլոր դետալները բեմադրված էին՝ սկսած որդեկորույս մոր շնորհակալություն հայտնելուց ու Փաշինյանին գրկելուց:
«Որովհետեւ եթե մարդը ուզում է Նիկոլ Փաշինյանին մի բան ասել, իսկ Փաշինյանը չի ուզում, այդ մարդը երբեք չի կարողանա հասնել նրա մոտ: Այդ բոլորը բեմադրած բաներ են: Համոզված եմ, որ նրա այցից մեկ ամիս առաջ մեդիամասնագետները, PR մասնագետները գնում են այնտեղ, նայում են՝ ով է ամենաանապահովը, ո՞ւմ են շատ փող տվել, կամ ում պետք է էլի փող տան: Ամեն ինչ փողի մեջ է:
Ինձ համար հարգելի Առուշ Առուշանյանին էլ բերեցին հասցրեց փողին, ինչն ինձ համար ընդունելի չէ, բայց հասկանալի է: Բաներ կան, որ հասկանում ես, արդարացնես, չարդարացնես, դա քո գործը չի, քանի որ դու իր կաշվի մեջ չես: Դրա համար ես իրեն չեմ արդարացնում, չեմ էլ մեղադրում:
Կարդացեք նաև
Մարդը բառացի ասաց՝ 6 մլրդ գումար է գալիս Սյունիք, 3 մլրդը դրա ստորագրությամբ, եւ եթե նա (Նիկոլ Փաշինյանը-Գ.Հ.) իր ստորագրությունը հանի, չի գալու էդ գումարը, ես էլ 30 հազար հոգու համար պատասխանատու եմ: Ես հասկանում եմ դա, որովհետեւ գիտեմ, որ ցավոք, Հայաստանում ամեն ինչը բերել, հասցրել են փողի»,-ասաց Հովհաննես Գալստյանը:
Գոհար ՀԱԿՈԲՅԱՆ
