Օգոստոսի 17-ին ՀՀ վարչապետ Նիկոլ Փաշինյանը Կապան ժամանեց օդանավով եւ հայտարարեց, որ եկող շաբաթվանից սկսելու են կանոնավոր չվերթները, իսկ արդեն՝ օգոստոսի 19-ին Կապանի օրվա առթիվ կլինի ներկայացուցչական չվերթ։
Սակայն օգոստոսի 18-ի վաղ առավոտյան, ըստ ազգային անվտանգության ծառայության հաղորդագրության, ադրբեջանական կողմից, դեռեւս չպարզաբանված ավտոմեքենայով Հայաստան-Ադրբեջան սահմանագծի Կապանի «Սյունիք» օդանավակայանի հարակից տարածք եկած անհայտ անձը Ադրբեջանի տարածքից երեք կրակոց է արձակել Կապանի «Սյունիք» օդանավակայանի ուղղությամբ եւ հեռացել։
Այս միջադեպից հետո դեռեւս չի հաջողվել ճշտել կիրականցվի օգոստոսի 19-ի ներկայացուցչական դռները, քանի որ «Սյունիք» օդանավակայանի պատասխանատուները չեն պատասխանում մեր հեռախոսազանգերին։
Չնայած «Սյունիք» օդանավակայանի դռները փակ էին մեր առջեւ, բայց ներսում եռուզեռ էր։ Ըստ մեր աղբյուրների՝ Կապան-Երեւան չվերթի տոմսը կարժենա 20 հազար դրամ։ Թռիչքի տեւողությունը 45 րոպե է։
Կարդացեք նաև
Համեմատության կարգով նշենք, որ Կապանից մայրաքաղաքը երթեւեկությունը իրականացվում է տրանսպորտային միջոցներով, տեւում է 4-ից 5 ժամ։ Իսկ տաքսի ծառայությունները մեկ ուղեւորի համար գանձում են 7000 դրամ։
Հիշեցնենք, որ փորձնական տեխնիկական առաջին թռիչքը Երեւանից Կապան իրականացավ այս տարվա ապրիլի 26-ին։ Այդ օրը տարածքային կառավարման եւ ենթակառուցվածքների նախարար Գնել Սանոսյանը հայտարարեց, որ հեռանկարում պլաններ կան Կապանը ոչ միայն «Զվարթնոցի» հետ կապել, այլ նաեւ որոշ օդանավակայանների հետ։
Արմեն ԴԱՎԹՅԱՆ
