«Հայաստանի եւ Ադրբեջանի իշխանությունների հետ երկխոսության մանրամասները հրապարակել չեմ կարող, միայն կարող եմ ասել, որ Կարմիր խաչի կազմակերպությունը պատրաստակամ է մարդասիրական գործողություններ կատարելու: Լաչինի միջանցքով տեղափոխումները իրականացնում ենք՝ բոլոր առումներով, որոշում կայացնող կողմերի համաձայնությամբ: Եթե կա համաձայնությունը, մենք կատարում ենք գործողություն, բայց որոշում կայացնելը մեր ձեռքում չէ: Մենք կարող ենք փորձել՝ հորդորել, երկխոսության վարել կողմերի հետ, սակայն որոշումն, ի վերջո, կայացնում են կողմերը, ոչ թե մենք»,-Aravot.am-ի հետ զրույցում ասաց Կարմիր խաչի երեւանյան գրասենյակի մամուլի պատասխանատու Զառա Ամատունին՝ անդրադառնալով օրերս ավտովթարում զոհված արցախցի Հելեն Դադայանի աճյունն Արցախ տեղափոխելու Ադրբեջանի արգելքին:
Այսօր պարզ դարձավ, որ թեեւ չնայած նախնական համաձայնություններին, Երեւան-Գյումրի ավտոճանապարհի 90-րդ կիլոմետրում, Լանջիկ գյուղի մատույցներում վերջերս տեղի ունեցած ողբերգական ավտովթարի զոհ դարձած Արցախի Ճարտար գյուղի բնակիչ Հելեն Դադայանի աճյունն Ադրբեջանը թույլ չի տալիս տեղափոխել Արցախ:
Հարցին՝ ի՞նչ պատճառաբանությամբ է Ադրբեջանը փոխել որոշումը, Զառա Ամատունին պատասխանեց, որ Կարմիր խաչը չեզոք կազմակերպություն է եւ բանակցությունների որեւէ մանրամասն, իրենք հանրային հարթակ չեն կարող դուրս բերել:
Հետաքրքրվեցինք՝ Ադրբեջանի այս որոշումը վերջնակա՞ն է, թե՞ հնարավոր է կրկին փոփոխություններ լինեն, Զառա Ամատունին պատասխանեց. «Շատ դժվար է ասել: Մենք չենք կարող խոսել որեւէ իշխանության փոխարեն: Մենք մեր կողմից խնդիրները վերհանում ենք այնքան, որքան կարող ենք, որքան կարողություններ ունենք՝ ինչ-որ մի բան փոփոխելու, բայց անպատասխանատու կլինի կողմերի փոխարեն ենթադրություններ անել»:
Կարդացեք նաև
Նելլի ԳՐԻԳՈՐՅԱՆ
Լուսանկարը՝ Զառա Ամատունու ֆեյսբուքյան էջից
