«Արդար Հայաստան» կուսակցության ղեկավար Նորայր Նորիկյանը ֆեյսբուքյան իր էջում գրում է.
«Օգոստոսի 11-ին պաշտոնական Երևանը դիմել է ՄԱԿ-ի Անվտանգության խորհուրդ՝ Լեռնային Ղարաբաղի խաղաղ բնակչությանը հարկադրված լիակատար շրջափակման հետևանքով հումանիտար իրավիճակի վատթարացման առնչությամբ արտահերթ նիստ գումարելու պահանջով:
Ներկայացված դիմումով ընդգծվել է, որ ․․․Լեռնային Ղարաբաղի ժողովուրդն այսօր կանգնած է հումանիտար լիակատար աղետի եզրին։
Միաժամանակ ընդգծվել է, որ Ադրբեջանի գործողությունները հանդիսանում են 2020 թվականի նոյեմբերի 9-ի եռակողմ հայտարարության և միջազգային մարդասիրական իրավունքի կոպտագույն խախտում, և ուղղակիորեն խախտում են ՄԱԿ Արդարադատության միջազգային դատարանի՝ 2023 թվականի փետրվարի 22-ի և հուլիսի 6-ի որոշումները, որոնց համաձայն Ադրբեջանը պետք է «ձեռնարկի բոլոր միջոցները Լաչինի միջանցքով անձանց, տրանսպորտային միջոցների և բեռների անխափան տեղաշարժը երկու ուղղություններով ապահովելու համար»։
Կարդացեք նաև
Բնակչության համար կյանքի հետ անհամատեղելի պայմանների կանխամտածված ստեղծումը ոչ այլ ինչ է, քան զանգվածային ոճրագործություն՝ ուղղված Լեռնային Ղարաբաղի բնիկ ժողովրդի դեմ, և ստիպելու նրանց լքել իրենց տներն ու հայրենիքը: Լեռնային Ղարաբաղի ժողովրդի նկատմամբ նման կոլեկտիվ պատժի կիրառումը գոյաբանական վտանգ է ներկայացնում վերջիններիս համար, եթե նրանք միայնակ մնան ադրբեջանական ագրեսիվ քաղաքականության դեմ։
Ներկա պայմաններում Հայաստանի կառավարությունը հայցել է ՄԱԿ Անվտանգության խորհրդի՝ որպես միջազգային խաղաղության և անվտանգության պահպանման համար պատասխանատու առաջնային մարմնի միջամտությունը՝ կանխելու զանգվածային ոճրագործությունները, ներառյալ` պատերազմական հանցագործությունները, էթնիկ զտումները, մարդկության դեմ հանցագործությունները և ցեղասպանությունը:
Դեռևս ս․թ․ մարտի 5-ին և հունիսի 22-ին անդրադարձել եմ վերը նշված խնդրին՝ ընդգծելով, որ պետք է չափից դուրս լուրջ մոտենալ այս հարցին և օգտագործել միջազգային լեգիտիմ հնարավորությունը՝ ՄԱԿ-ի անվտանգության խորհրդի բանաձևի մակարդակով հասնելու հնարավորին։
Պետք է հուսալ, որ նիստից առաջ կազմակերպվել ու անցկացվել են բարձր մակարդակով բանակցություններ ու խորհրդակցություններ՝ ՄԱԿ-ի անվտանգության խորհրդի անդամ հանդիսացող երկրների հետ՝ հնարավորինս նպաստավոր բանաձև ընդունելու համար։
Շատ պարզ ուղերձ պետք է հասանելի դարձվի ՄԱԿ-ի անվտանգության խորհրդին, որ Ադրբեջանը թքած ունի միջազգային խաղի կանոնների վրա, ոչ միայն չի կատարում ստանձնած պարտավորությունները, այլև միջազգային դատարանի վճիռը, ինչպես նաև պատրասվում է էթնիկ զտման ենթարկել Արցախահայությանը, միաժամանակ՝ գոյաբանական սպառնալիք հանդիսանալով Հայաստանի համար»։
