«Մի երկրում, որտեղ դատարանի դահլիճում այլախոհի են սպանել, շատ բարձր ակնկալիքներ չեն կարող լինել»,-Հակակոռուպցիոն դատարանում ՀՀԿ փոխնախագահ Արմեն Աշոտյանի խափանման միջոցը փոխելու վերաբերյալ դատական նիստի հետաձգումից հետո դատարանի բակում լրագրողների հետ զրույցում հայտարարեց ՀՀ ԱԺ «Պատիվ ունեմ» խմբակցության ղեկավար Հայկ Մամիջանյանը։
Ըստ նրա՝ Արմեն Աշոտյանը մեղավոր է, որ հայրենասեր է․ «Դա մեր երկրում այս պահին իշխանության կարծիքով ամենածանր հանցագործությունն է։ Բոլոր այն մարդիկ, որոնք այդ հանցագործությունը գործում են, իշխանությունները փորձում են կոտրել։ Բայց դա անհնար է։ Նման գործելաոճ որդեգրել է նաև Ալիևը․ փորձում է Արցախի մեր քույրերին ու եղբայրներին կոտրել»։
Հայկ Մամիջանյանը պնդեց․ «Ակնհայտ է, որ Արմեն Աշոտյանը որևէ կապ չունի մեղսագրվող ոչ մի արարքի հետ՝ թե՛ այսպես կոչված հանցագործության հետ, թե՛, առավել ևս, գործի ընթացքին խանգարելու։ Այդ ձայնագրությունների մեջ, որոնք հրապարակվել էին, Արմեն Աշոտյանի ձայնը չկա, և, ամենակարևորը, քննչականը դրանք ունի փետրվար ամսից, թե ինչու Աշոտյանը կալանավորվեց հուլիսին, թողնում եմ, որ հեռուստադիտողները որոշեն»։
Լրագրողները հետաքրքրվեցին՝ պատճառը նաև Արցախում սրացումնե՞րն էին, Հայկ Մամիջանյանը պատասխանեց․ «Այդ թվում նաև Արցախի հարցի սրացումները։ Այս իշխանություններին պետք չեն մարդիկ, որոնք ունեն ավելի շատ միջազգային գործընկերներ և ընկերներ, քան իրենք ձեռք են բերել վերջին 5 տարիների ընթացքում»։
Կարդացեք նաև
Տաթեւ ՀԱՐՈՒԹՅՈՒՆՅԱՆ
