Քիչ առաջ Հակակոռուպցիոն դատարանում հետաձգվեց ՀՀԿ փոխնախագահ Արմեն Աշոտյանի խափանման միջոցը փոխելու վերաբերյալ դատական նիստը:
Լրագրողների հարցին՝ ինչո՞ւ դարձյալ հետաձգվեց նիստը, Արմեն Աշոտյանի պաշտպան, փաստաբան Տիգրան Աթանեսյանը պատասխանեց․ «Հարցաքննությունների տեսաձայնագրություններ կան, որտեղ հրապարակվում են ներքին, արտաքին դիտումները։ Պարոն Աշոտյանը կարողացել է քրեակատարողական հիմնարկի պայմաններում ծանոթանալ կեսին, իր խոսքերով՝ հայտնաբերել է լուրջ հակասություններ գրավորի և բանավորի միջև։ Հետևաբար` դրանք մինչև վերջ դիտելու անհրաժեշտություն կա։ Դատարանի դահլիճում տեղադրվեց համակարգիչ, նիստը հետաձգվեց մինչև 18։30, որ Արմեն Աշոտյանը կարողանա ծանոթանալ»։
Հարցին՝ դա տեխնիկապես հնարավո՞ր է, Տիգրան Աթանեսյանը կատակեց․ «Այո, քննչական կոմիտեն նոր՝ Սնուփ դոգի լափթոփերից երևի ուղարկել է»։
Տիգրան Աթանեսյանը նաև հավելեց՝ նիստն, ըստ էության, չի սկսվել։ Այսօր՝ ժամը 18։30-ից հետո նիստը կշարունակվի։
Կարդացեք նաև
Ըստ Տիգրան Աթանեսյանի՝ դատարանի բակում ցույց իրականացնելը նպատակահարմար չէ․ «Արմենին նստեցրել է Նիկոլը, ակցիան պիտի լինի Հանրապետության հրապարակում»։
Լրագրողների դիտարկմանը՝ նշեցիք, որ Արմեն Աշոտյանը հակասություններ է տեսել և հարցին՝ ի՞նչ հակասությունների մասին է խոսքը, Տիգրան Աթանեսյանը պատասխանեց․ «Չեմ ուզում նախաքննական գաղտնիք բացել, բայց կան բաներ, որոնք հօգուտ Արմենի են, և արձանագրված չեն»։
Տաթև ՀԱՐՈՒԹՅՈՒՆՅԱՆ
