Ինչո՞ւ է ՀՀ-ում անցկացվող սպորտային միջոցառումների ժամանակ ելույթ ունենում վարչապետը, ոչ թե նախագահը, ինչպես որ ընդունված է աշխարհում։
Ուսումնասիրելով միջազգային պրակտիկան՝ կտեսնենք, որ նույնիսկ խորհրդարանական երկրներում մեծամասշտաբ մարզական իրադարձությունները մեկնարկում են պետության գլխի՝ միապետի կամ նախագահի ելույթից հետո:
Հայաստանի Սահմանադրության համաձայն՝ պետության գլուխը Հանրապետության Նախագահն է, բայց չափազանցություն կլինի, եթե ասենք, որ նախագահական ինստիտուտը հայ ժողովրդի կյանքում որևէ կշիռ ունի:
Օգոստոսի 5-ին Համահայկական 8-րդ խաղերի մեկնարկն ազդարարվեց վարչապետ Նիկոլ Փաշինյանի ելույթով: Նախագահ Վահագն Խաչատուրյանին տեսանք միայն կառավարական օթյակում՝ շքերթով անցնող մարզիկներին ձեռքով ողջունելիս:
Կարդացեք նաև
Մինչ Հայաստանի վարչապետը առիթը չի կորցնում ապացուցելու, որ նա է Հայաստանի «շեֆը», եվրոպական մի շարք խորհրդարանական հանրապետություններում անցկացված միջազգային սպորտային իրադարձությունները բացվել են պետության գլխի՝ նախագահի ազդարարմամբ:
Աթենքում անցկացված 2004 թվականի Ամառային օլիմպիական խաղերի սկիզբն ազդարարել է այդ երկրի նախագահ Կոնստանտինոս Ստեֆանոպուլոսը, այլ ոչ թե վարչապետ Կոնստանտինոս Կարամանլիսը:
Բացումը՝ 3:01:50։
2006-ի Ձմեռային օլիմպիական խաղերը հյուընկալում էր իտալական Թուրին քաղաքը: Խաղերը բացված համարեց Իտալիայի նախագահ Կառլո Չամպին և ոչ վարչապետ Սիլվիո Բեռլուսկոնին:
Բացումը՝ 2:12:03։
2006 թվականի Ֆուտբոլի աշխարհի առաջնությունն անց էր կացվում Գերմանիայում: Այն մեկնարկեց Դաշնային Հանրապետության նախագահ Հորսթ Քյոլերի ելույթով, այլ ոչ կանցլեր Անգելա Մերկելի:
Բացումը՝ 26:05։
Այնպես չէ, որ այս երեք խորհրդարանական երկրներում նախագահը զգալի սահմանադրական գործառույթներ ունի: Նախագահը արարողակարգային դերակատար է՝ նրա պետության, ազգի և ժողովրդի վերքաղաքական խորհրդանիշը կամ դեմքը, ուստի տրամաբանական է, թե ինչու են վերը նշված միջոցառումները մեկնարկել, ոչ թե երկրի փաստացի ղեկավարի (վարչապետի), այլ երկրի խորհրդանիշի (նախագահի) կողմից:
Միանգամայն տրամաբանական կլիներ, որ Համահայկական խաղերը, կրելով ազգային միասնականությունն ամրապնդելու և սփյուռքահայերին հայրենիք բերելու միտում, բացվեր Հանրապետության Նախագահ Խաչատուրյանի համախմբող և մարզական բնույթ կրող, ինչպես նաև համազգային և համապետական շահերի մասին ելույթով:
Հայաստանն արդեն 5 տարի է՝ անցում է կատարել կառավարման խորհրդարանական համակարգին, սակայն որևէ փոփոխություն, կարծես, չկա: «Նախագահ» բառը պարզապես փոխարինվել է «վարչապետ»-ով:
Արսեն ԱՅՎԱԶՅԱՆ
