Երեկ հրազենային մահացու վիրավորում ստացած Գրանիկ Վարդանի Խնկոյանը Շիրակի մարզի Բենիամին գյուղից էր, ծառայում էր Արարատում։ Համագյուղացիների համար առեղծվածային է նրա մահը, որևէ մեկը չի հավատում, որ նա կարող էր ինքնասպանություն գործել։
«Նա այնքան ժիր էր, աշխույժ, որ անհավատալի է ինքնասպանության վարկածը, նրան չէին կարողանա որևէ բան ստիպել, թելադրել։ Տանը երեք տղա են, Գրանիկի ծնողները երկար ժամանակ՝ երևի թե 7 տարի երեխա չէին ունենում։ Գրանիկը նրանց առաջնեկն է, եղբայրներից մեկը դպրոցական է, մյուսը շատ փոքր է։
Գրանիկը յուրահատուկ ընտանիքից է, առավոտյան ընթերցեցի գույժն այդ նույն զորամասում մեկ այլ զինվորի մահվան ու ասի՝ հիմա ո՞ւմ տունը քանդվեց։ Քիչ անց իմացանք նաև Գրանիկի մասին, շոկի մեջ եմ, չեմ հավատում․․․
Գրանիկը ընդունվել էր Շիրակի պետական համալսարանի ֆիզկուլտուրայի բաժինը։ Այս տարվա հունվարին գնաց բանակ, 19 տարին դեռ չի լրացել։
Կարդացեք նաև
10 օր առաջ արձակուրդ էր եկել, եկավ նաև մեր տուն՝ միշտ սիրուն ժպիտը դեմքին էր, զրուցեցինք, որևէ բողոք ծառայությունից չեմ լսել կամ տրամադրության անկում չեմ նկատել իր մոտ։
Մեզ համար սա առեղծվածային մահ է», -ասաց նրանց բարեկամներից մեկը։
Զինվորին ամենայն հավանականությամբ կհուղարկավորեն վաղը։
Նունե ԱՐԵՎՇԱՏՅԱՆ
