Նիկոլ Փաշինյանը, կառավարության այսօրվա նիստի օրակարգը սպառելուց հետո, կառավարության անդամներին խորհուրդ տվեց առանց թիմերի կողմից ծրագրման գնալ բակեր, նստել ու խոսել մարդկանց հետ և լսել նրանց խնդիրների մասին։
Հիշեցնենք, որ սեպտեմբերի 17-ին կկայանան Երևանի ավագանու ընտրությունները:
«Վերջին օրերին ես մարզերում եմ եղել, և դա` ոչ պաշտոնապես։ Խնդիրներ եմ արձանագրել, որոնք գործնականում ոչ մի զեկույցում և նիստում չեն արձանագրվել։ Դրանցից մեկը կապված է ճանապարհների սպասարկման հետ, ինչը, մեղմ ասած, շատ վատ է։ Հանրապետությունում եզրային գծանշումներ կան, որ 7-8 սմ ավազի տակ են, երթևեկելի հատվածը նորմալ գծանշված չէ։ Ճանապարհային նշաններ էլ կան, որ 1990-ականներից այս կողմ չեն փոխվել։ Օրինակ` Խոր Վիրապի ցուցանակն առնվազն իմ տարիքին է։ Ճանապարհներին էլ փոսերը բազմաթիվ են։ Մտքներովդ չի՞ անցնում, թե ինչի պետք է ես զբաղվեմ այս հարցերով»,–կառավարության նիստում շեշտեց Փաշինյանը։
Նա խորհուրդ տվեց, խնդրեց, այնուհետև հանձնարարեց կառավարության անդամներին ժամանակ առ ժամանակ, առանց ծրագրավորելու, ուղղակի գնալ ու մտնել բակեր, նստել մարդկանց հետ։ Ըստ նրա` այդ ժամանակ շատ հարցեր ի հայտ կգան, որոնք ոչ մի այլ խողովակով չեն պարզվի։
Կարդացեք նաև
Փաշինյանն ընդգծեց` անգամ համաձայն է, որ կառավարության անդամներն աշխատանքային օրերն օգտագործեն այդ նպատակով։
Նրա խոսքով, դա պետք է արվի ոչ պաշտոնական հագուստով և, առհասարակ, ոչ պաշտոնական տարբերակով։
Մանրամասները՝ տեսանյութում
Լուսինե ՄԱՐԳԱՐՅԱՆ
Լուսանկարը՝ «Ազատություն» ռադիոկայանի, 2017թ.
