«Պարզ է, որ ազնիվ ազատամարտիկները հավաքվել եւ ուզում են Լաչինի միջանցքը բաց անել ու ասում են, եթե պետք է, նաեւ ուժային ճանապարհով ու կոչ անում հայ տղամարդկանց միանալ իրենց»,- ասաց Դեմոկրատական կուսակցության նախագահ Արամ Գասպարի Սարգսյանը «Հայելի» ակումբի ուղիղ եթերում «Խաչակիրներ» ջոկատի անդամների մասին:
«Բայց միեւնույն ժամանակ ասում են, որ հանկարծ չքաղաքականացնեն: Մեկը հարցնում է, թե ո՞վ է մեղավոր, Նիկո՞լը, ասում են ՝ Նիկոլի թեման փակեք: Տղերք ջան, կիսատ-պռատ գործ չեն անում: Պատճառը Երեւանում է: Եթե մենք կարողանանք այս իշխանությունից վերջապես ազատվել, Լաչինն էլ կբացվի, Արցախն էլ կազատագրվի, Սյունիքն էլ դուրս կգա վտանգից: Շատ լավ է, որ այդպիսի պոռթկումներ լինում են, մարդիկ հասկանում են վիճակը, եւ որ մեր հայրենակիցներին պետք է փրկել: Բայց գեներալի կոչումով մեկը, փոխանակ մտածի, թե ոնց անենք, որ իսկապես կարողանանք դուրս գալ այս վիճակից, ասում է՝ ռուսներն են մեղավոր: Իրականում դու եւ քո նման գեներալ կոչվածներն են մեղավոր, որ չեք կարողացել պաշտպանել մեր հողը:
Մենք շատ հստակ ասել ենք. սա պիտի հրաժարական տա, որպեսզի ձեւավորվի նոր իշխանություն: Բայց միջանկյալ մի խնդիր կա, որպեսզի Արցախը ազատվի այս շրջափակումից: Մենք պետք է հասնենք նրան, որ այսօր վարչապետի աթոռին կառչած, ոնց ասում են՝ սոսնձված անձը հրաժարվի իր ասածից, որ Արցախը Ադրբեջանի կազմում է: Սա պիտի ասի մինչեւ հեռանալը, մինչեւ կհասնենք սրա հեռանալուն, որովհետեւ այսպես շարունակվելու դեպքում ամբողջ Հայաստանն ենք կորցնելու: Հիմա իր արած հայտարարությունից հրաժարվելու պահանջ, հրամայական պետք է լինի:
Մենք պետք է սրան պարտադրենք, որ հայտարարի՝ այսինչ պայմաններից, Ադրբեջանի եւ Թուրքիայի կեցվածքից ելնելով, Էրդողանի ասածից հետո ինքը հրաժարվում է իր հայտարարությունից, թե Արցախը Ադրբեջանի մաս է: Որովհետեւ այդ հայտարարությունը դարձավ պատճառ, որ բոլոր գերտերությունները եւ ընդհանրապես, ամբողջ միջազգային հանրությունը մտածեր, թե ընդամենը սա էր կռիվը: Եթե դու ասել ես, թե դա իրենն է, բոլորը պետք է համաձայնեն դրան»,-ասաց Արամ Գ. Սարգսյանը:
Կարդացեք նաև
Բանախոսը դիմեց բոլոր նրանց, ովքեր մնացել են ու կատարում են իշխանության ղեկավարի հրամանները: «Ախր, դուք էլ եք հանցակից, հավասարապես մեղավոր եք դառնում եւ դուք էլ հավասարաչափ պատժվելու եք»,-ասաց Արամ Գ. Սարգսյանը:
Աշոտ ՀԱԿՈԲՅԱՆ
