Պեմզաշենում 31-ամյա Զարինե Մելիքսեթյանի և նրա երկու անչափահաս երեխաների` 12-ամյա դստեր և 8-ամյա որդու դաժան սպանության մեջ մեղադրվող Արկադի Բարսեղյանը՝ «Տիխի» մականվամբ, որ նրանց համագյուղացին է, օգոստոսի 4-ից հացադուլ է հայտարարել։
Նա պահանջում է փոխել քննիչին․ գործը հանձնել ավելի փորձառուի, որպեսզի ապացուցվի իր անմեղությունը։ Նրա վիճակը բժիշկները գնահատել են բավարար։
Այս մասին Aravot.am-ը տեղեկացավ ՀՀ ԱՆ քրեակատարողական ծառայության մամուլի խոսնակ Նոնա Նավիկյանից։
ՀՀ Քննչական կոմիտեի նախագահի մամլո քարտուղար Գոռ Աբրահամյանն էլ հավելեց, որ գրեթե մեկ ամիս առաջ այդ անձանց նկատմամբ խափանման միջոց կալանքի ժամկետը երկարաձգվել է՝ երկու ամիս ժամկետով։
Կարդացեք նաև
Հիշեցնենք, որ այս գործով կան երկու կալանավորվածներ։
Մեղադրյալներից մեկը՝ Պեմզաշենի 32-ամյա բնակիչ Վրույր Բարսեղյանն է, որը սպանությունից զատ մեղադրվում է նաև մանկապղծության մեջ, ըստ գործի նյութերի, 2022թ. նոյեմբերի 8-ին՝ ժամը 21:00-ի սահմաններում, իր ազգական, նույն բնակավայրի 41-ամյա բնակիչ «Տիխի» մականվամբ Արկադի Բարսեղյանի հետ էր ներխուժել Մելիքսեթյանների տուն։
Արկադի Բարսեղյանի պաշտպանության մեջ ներգրավված փաստաբանը` ՀՔԾ-ի նախկին քննիչ Վոլոդյա Մինասյանը, ի սկզբանե տեղեկացրել էր, որ իր պաշտպանյալը չի ընդունում իրեն առաջադրված մեղադրանքը, նա մանրամասն ցուցմունք է տվել՝ նշելով, որ դեպքի վայրում չի եղել։
Հիշեցնենք, որ Արկադի Բարսեղյանն արտագնա աշխատանքի էր մեկնում․ ի դեպ, գյուղի շքեղ տներից մեկը նրան է պատկանում։
Պեմզաշենցիները նշում են, որ նա կրիմինալ հակումներ չի ունեցել, գյուղում չի խոսվել այդ մասին, դատվածություն չի ունեցել։ Վատ առումով աչքի չի ընկել։
Իսկ Վրույր Բարսեղյանի դեպքում համոզմունք ունեն, որ նա ամեն ինչի ունակ է, բայց հաստատ նրան ուղղորդող է եղել, քանի որ նա մտավոր ունակություն չունի այդքանն անելու։ Նա գյուղում էլ, ըստ պեմզաշենցիների, աչքի տեսածը կարող էր թռցնել, ասենք՝ հեռախոս, կոշիկ։
Վրույր Բարսեղյանի հոր հորեղբայրը, ըստ գյուղացիների, ժամանակին սպանել է իր երկու կանանց ու հայտնվել դատախազներից մեկի՝ սպանությունների մասին գրված գրքի մեջ։ Գյուղացիները չեն բացառում, որր տվյալ դեպքում գենետիկան է խոսել 32-ամյա տղամարդու մեջ։ Վրույրի հայրն էլ, գյուղացիների մեկի փաստմամբ, գողության համար ժամանակին դատվել է։
Նունե ԱՐԵՎՇԱՏՅԱՆ
