«Տարբեր հարցեր բարձրացվեցին, մեր հիմնական պահանջը երեք տարի չի փոխվել՝ մեզ փախստականի կարգավիճակ է պետք եւ բնակարաններով ապահովել»,- աշխատանքի եւ սոցիալական հարցերի նախարար Նարեկ Մկրտչյանի հետ այսօրվա հանդիպումից հետո լրագրողներին ասաց «Հանուն Հադրութի» ՀԿ նախագահ Լեւոն Հայրյանը։
Նրա խոսքով՝ նախկինում կառավարության անդամներն իրենց խոստանում էին, որ հադրութեցիներին ու շուշեցիներին տեղավորելու են Արցախում։ «Այսօր նախարարին հարցրեցի՝ հիմա ի՞նչ կասեք այս իրավիճակում, երբ նույնիսկ հումանիտար օգնություն չենք կարողանում տանել Արցախ։ Իր փոխարեն ես պատասխանեցի այդ հարցին, ասացի՝ դեռ երեք տարի առաջ ես ձեզ ասել եմ, որ հնարավոր չէ մեզ համար այնտեղ տներ կառուցել, ես գիտեի, թե ինչ զարգացումներ էին լինելու։ Ռուսը եկել է այնտեղ, որ ոչ թե խաղաղություն ապահովի, եկել է, որ թուրքերին մեզնից պաշտպանի, ոչ թե հայերին պաշտպանի։ Որպես կառավարության անդամի՝ նախարարին խնդրեցինք, որ վարչապետին եւ բարձր ատյաններին փոխանցի, որ մեր հիմնական պահանջը փախստականի կարգավիճակն է եւ Հայաստանում Հադրութից, Շուշիից, Արցախի այլ համայնքներից տեղահանվածների համար համայնք կառուցելը, որպեսզի այդ ժողովուրդը չցրվեն, համայնքը, համայնքային մշակույթը պահպանվի։ Մեզ խոստացավ փոխանցել»,- ասաց նա։
Հայրյանի խոսքով՝ դեռեւս այս տարվա գարնանն անցկացված համաժողովի ժամանակ իրենց կողմից հարց էր բարձրացվել, որ փախստականների հարցերով զբաղվող մարմին ստեղծվի Հայաստանում։ Կառավարությունից խոստացել են, բայց այդ հարցը դեռ չեն լուծել։ «Խոսել ենք նաեւ փախստականների առօրյա խնդիրների մասին, բնակչության մի խավ ունենք՝ 50-60 տարեկան, աշխատանք չեն կարողանում գտնել, վաղը-մյուս օրը թոշակի գնալիս ստաժի հարց է առաջանում։ Քաշաթաղի եւ Քարվաճառի տեղահանված բնակիչների ներկայացուցիչներն էլ նախարարին այսօր ներկայացրին այն խնդիրները, որոնց բախվում են կառավարության հատկացրած վկայականներով բնակարաններ ձեռք բերելու գործընթացում։ Մեր տարեց ընկերներից մեկն ասաց՝ գոնե այնպես արեք, որ մենք այստեղից դուրս գալիս հասկանանք, որ ինչ-որ բան փոխվեց։ Մեր բարձրացրած քաղաքական հարցերի մասով խոստացան, որ փոխանցելու են քաղաքական ղեկավարությանը, իսկ սոցիալական հարցերի վերաբերյալ ասացին, որ մի քանի ծրագրեր ունեն»,- հավելեց նա։
Ռոզա ՀՈՎՀԱՆՆԻՍՅԱՆ
