Միացյալ Թագավորության Լորդերի պալատի անդամ, բարոնուհի Քերոլայն Քոքսը միջազգային դերակատարներին կոչ է արել վերջ տալ Ադրբեջանի հանդեպ թողտվությանը, ինչի արդյունքում այդ երկիրը սովի և ցեղասպանության է ենթարկում արցախահայությանը:
«142 օր է, ինչ Ադրբեջանն ամբողջությամբ կամ մասնակիորեն դադարեցրել է գազամատակարարումն Արցախ, իսկ 180 օր է, ինչ էլեկտրաէներգիայի մատակարարումը ամբողջությամբ խափանվել է, որի հետևանքով էլ բազմաթիվ օբյեկտների ամենօրյա հոսանքազրկումներ և վթարային անջատումներ են արձանագրվում: Դպրոցները ստիպված են եղել փակվել սննդի պակասի պատճառով, իսկ տարածվող տեսանյութերը ցույց են տալիս խանութների դատարկ ցուցափեղկերի անչափ ցնցող կադրերը, երբ այդ ցուցափեղկերը պետք է լիարժեքորեն համալրված լինեին սննդով, դեղամիջոցներով և սարքավորումներով՝ ամենօրյա կարիքները սպասարկելու համար», – իրավիճակին է ծանոթացնում բրիտանացի խորհրդարանականը:
Հայտարարությունում բարոնուհի Քոքսն անդրադառնում է նաև թերսնման, ինչպես նաև դեղորայքի և բժշկական պարագաների պակասի պատճառով ստեղծված ծանր առողջապահական իրավիճակին, արձանագրում՝ տվյալներ կան, որ առաջացած դժվարությունների և սթրեսային մթնոլորտի ֆոնին վաղաժամ ծննդաբերության և մեռելածնության դեպքերը եռապատկվել են:
Հայ ժողովրդի բարեկամ քաղաքական գործիչը նաև փաստեր է ներկայացրել Ադրբեջանում առկա հայտյացության և ռազմատենչ տրամադրվածությունների բարձր մակարդակի հետ կապված՝ առաջ բերելով երկու ցայտուն օրինակ:
Կարդացեք նաև
Ադրբեջանի նախագահ Իլհամ Ալիև. «Ես ասել էի, որ նրանց (հայերին) կվռնդենք, կվռնդենք, ինչպես շներին, և մենք վռնդեցինք նրանց, ինչպես շներին»:
Մետե Թուրքսոյ, ադրբեջանցի քաղաքական ակտիվիստի թվիթերյան գրառումը. «Լեռնային Ղարաբաղում կենդանի մարդ պետք է չմնա»:
Խորհրդարանականը խոսում է նաև Հայաստանի և Արցախի ժողովրդի հանդեպ տածած սիրո և հիացմունքի մասինё շեշտելով՝ իր համար մեծ պատիվ է, որ գրեթե 90 անգամ այցելել է պատմականորեն հայկական Արցախ: «Ես ականատես եղա 1990-ականների սկզբին Ադրբեջանի կողմից հայերի դեմ մղված պատերազմին և հայ բնակիչների խիզախությանը, որը հանգեցրեց նրանց ազատությանը՝ շարունակելու ապրել իրենց թանկարժեք հողում։ Նրանք ժողովրդավարության հաստատմամբ զարգացրել են իրենց քաղաքական ազատությունները և սատարել են բարձրորակ կրթության, առողջապահության, գյուղատնտեսության և մշակույթի ոլորտների զարգացմանը», – ընդգծում է Քոքսը:
Նրա խոսքով՝ չնայած հայ և ադրբեջանցի պաշտոնյաները բանակցություններ են վարում, Լեռնային Ղարաբաղի քաղաքացիները շարունակում են տառապել: Մեծ Բրիտանիայի Լորդերի պալատի անդամ, բարոնուհի Քերոլայն Քոքսը բոլոր անձանց, ովքեր մտահոգված են Արցախում կատարվող իրադարձություններով, կոչ է անում անել ամեն հնարավորը, որպեսզի Ադրբեջանը պատասխանատվության ենթարկվի իր կողմից իրականացված մարդկության դեմ հանցագործությունների համար: Քոքսը եզրափակում է. «Ադրբեջանը պետք է պատասխանատվության կանչվի ներկա ճգնաժամի խաղաղ հանգուցալուծման համար, որի վերջնանպատակն է՝ երաշխավորել, որ արցախահայերը կարող են ազատորեն ապրել իրենց պատմական հողում»:
Արսեն ԱՅՎԱԶՅԱՆ
