Եթե Երեւանի ավագանու գալիք ընտրություններում հաղթի իշխանության թեկնածուն, Երևանի տնտեսությունում թուրքական ներդրումներ կլինեն։ Այս մասին այսօր հրավիրած ասուլիսում ասաց «Որդիների կանչ» ՀԿ անդամ Արա Ռոստոմյանը։
«Մենք որեւէ ձեւով Երեւանի քաղաքապետի ընտրություններին չենք մասնակցում, բայց եթե այնպես ստացվի, որ օրվա իշխանության սրտի թեկնածուներից մեկն անցնի, մենք կարծում ենք, որ Երեւանը վերածվելու է Բաթումիի։ Փափուկ ուժ է կիրառվելու, եւ թուրքական գումարները ներդրվում են Երեւանում՝ շինարարության տեսքով։ Եվ պատահական չէ, որ խաղաղության ֆոնի վրա Նիկոլ Փաշինյանը նաեւ Ալիեւի հետ պայմանավորվում է, որ 400 հազարի չափ ադրբեջանցիներ պետք է գան ու վերաբնակեցվեն Հայաստանում։ Մասնավորապես Երեւանում այս շինարարությունը արվում է իրենց համար տներ կառուցելու նպատակով։ Նաեւ, ինչո՞ւ ոչ, ամեն ինչ անելու են, որ Արցախը դատարկվի, եւ արցախցիների համար են արդեն նախօրոք շենքեր կառուցում։ Մեր բոլորիս խնդիրն է, հանրության խնդիրն է, որ Արցախը պետք է պահենք հայկական»,- ասաց նա։
Արա Ռոստոմյանը հավելեց․ «Մեր սփյուռքահայերին չեն թողնում մուտք գործել Հայաստան, բայց թուրքերը վխտում են Երեւանի փողոցներում։ Երկու օր առաջ սփյուռքահայ երիտասարդ աղջկա թույլ չտվեցին մուտք գործել Հայաստան։ Թուրքերն իրենց բարեկամներն են դարձել, հայերը՝ իրենց թշնամիները»։
Կարդացեք նաև
Ռոզա ՀՈՎՀԱՆՆԻՍՅԱՆ
