ՄԱԿ-ի Անվտանգության խորհրդի ամերիկյան նախագահության կողմից կազմակերպված «Սովի և հակամարտության հետևանքով գլոբալ պարենային անապահովություն» խորագրով բաց քննարկմանը Հայաստանի արտաքին գործերի նախարարի տեղակալ Վահե Գևորգյանից բացի Լեռնային Ղարաբաղի շրջափակմանն անդրադարձան նաև Խորհրդի մշտական անդամ Ֆրանսիան և ժամանակավոր անդամ Շվեյցարիան:
Ֆրանսիայի մշտական ներկայացուցչի տեղակալ, գործերի ժամանակավոր հավատարմատարը Լաչինի միջանցքով ազատ տեղաշարժի մասին խոսել է աշխարհում բոլոր անհրաժեշտ կետերին հումանիտար աջակցություն հասցնելու կարևորության համատեքստում:
«Ֆրանսիան այսօր նաև կոչ է անում վերացնել Լաչինի միջանցքով Լեռնային Ղարաբաղի բնակչությանը հումանիտար օգնություն հասցնելու և ազատ տեղաշարժի արգելքները՝ այս տարվա փետրվարին ընդունված Արդարադատության միջազգային դատարանի որոշմանը համապատասխան», – իր խոսքում հայտարարել է Ֆրանսիայի ներկայացուցիչը:
Շվեյցարիայի մշտական ներկայացուցչի տեղակալն էլ իր հերթին ընդգծել է ճգնաժամային գոտիներում Կարմիր խաչի միջազգային կոմիտեի ներգրավվածության հրամայականը:
Պաշտոնյան նշել է. «Մենք դատապարտում ենք, որ մարդասիրական դերակատարները, օրինակ՝ ԿԽՄԿ-ն, ոչ միշտ են կարողանում իրականացնել իրենց գործառույթները, ինչպես, օրինակ, Հարավային Կովկասում գտնվող Լաչինի միջանցքում է»:
Կարդացեք նաև
Ադրբեջանի պատվիրակությունը ՄԱԿ ԱԽ բաց քննարկումն օգտագործեց որպես աշխարհին մոլորեցնելու ևս մեկ հարթակ՝ դատապարտելով Հայաստանին՝ «հումանիտար աջակցության խնդիրը չարամիտ նպատակներով չարաշահելու համար»: Ըստ այդ երկրի մշտական ներկայացուցչի՝ Լաչինում անցակետ տեղադրելը «Ադրբեջանի ինքնիշխան իրավունքն է, ինչպես ցանկացած այլ երկիր իրավունք ունի պաշտպանել իր սահմանները»:
Ադրբեջանական պատվիրակությունը նաև մատնանշել է, որ Հայաստանի կողմից տեղադրված ականների պատճառով Ադրբեջանը տուժում է մինչ օրս: «Հայաստանը պարտավոր է առանց հապաղելու ականապատ տարածքների մասին կոնկրետ և ամբողջական տեղեկատվություն տրամադրել», – հայտարարել է ադրբեջանցի դիվանագետը:
Արսեն ԱՅՎԱԶՅԱՆ
