Aravot.am-ի տեղեկություններով, հուլիսի 18-ին, «Քրեակատարողական բժշկական կենտրոն»-ի Գորիսի ստորաբաժանման աշխատակիցները զննելով կալանավորված անձ 41-ամյա Հ․ Ե.-ն, նրա մոտ արձանագրել են «ճակատի պատռած վերքը, աջ ուսահոդի քերթվածքները, աջ նախաբազկի հեմատոմաները, աջ ծնկի քերծվածքներ»։
Հ․ Ե․-ն բանավոր հայտարարել է, որ վնասվածքները ստացել է «Սիսիանի գայի պոստ» կոչվող տարածքում։ Նրա պատմելով, ինքը քնած է եղել վարորդի կողքի նստատեղին։ Լսելով ձայներ՝ «չփախնել, կկրակեն» ՝ մի քանի հոգի բացել են մեքենայի դուռն ու նրան դուրս հանել՝ գցելով գետնին։
Ինքը գոռգոռացել եւ պահանջել է, որ թողնեն իրեն, սակայն անձինք, որոնք ոստիկանության Սիսիանի բաժնի աշխատակիցներ էին՝ իրեն գետնին գցած հայհոյել են, ոտքերով կանգնել են գլխին, մեջքին, ձեռքերին, ոտքերով հարվածել են ոտքերին, կրկին հայհոյել են մորը, կնոջը, երեխաներին, որից հետո տեղափոխել են ոստիկանության Սիսիանի բաժին, այնտեղ բժիշկ են հրավիրել, սակայն ինքը հրաժարվել է՝ պահանջելով դատաբժիշկ եւ փաստաբան, սակայն չեն հրավիրել:
Քննչական կոմիտեի Սյունիքի մարզային քննչական վարչության Գորիսի բաժնում նախաձեռնվել է քրեական վարույթ, կատարվում է քննություն։
