Ռուսաստանը շահագրգռված կմնա հայ-ադրբեջանական հարաբերությունների կարգավորման գործընթացն առաջ մղելու գործում, իսկ խոսակցություններն այն մասին, որ Ուկրաինայում պատերազմի հետևանքով արտաքին քաղաքականության որոշ ուղղություններ պակաս առաջնահերթ են դարձել, փաստական հիմք չունեն: Նման հայտարարություն է արել Ռուսաստանի ԱԳՆ խոսնակ Մարիա Զախարովան՝ մեկնաբանելով օրեր առաջ Հայաստանի վարչապետ Նիկոլ Փաշինյանի մամուլի ասուլիսի ժամանակ հնչած հայտարարությունն այն մասին, որ Ռուսաստանի բանակցային ակտիվությունը նվազել է:
«Ռուսաստանն անում է ամեն բան՝ տարածաշրջանում ամուր խաղաղության և համաձայնության հասնելու համար, և դա լիարժեք վերաբերում է Հարավային Կովկասին»,- ասել է Զախարովան:
Նրա խոսքով՝ ակտիվության թուլացման մասին խոսք անգամ չի կարող լինել՝ հաշվի առնելով, որ վերջին ամիսներին Ռուսաստանի ներգրավվածությամբ մի շարք շփումներ են տեղի ունեցել բարձր և բարձրագույն մակարդակով: Մասնավորապես, նա հիշեցրել է, որ մայիսի 25-ին տեղի է ունեցել առաջնորդների եռակողմ հանդիպում, հունիսի 12-ին՝ եռակողմ աշխատանքային խմբի հանդիպում, մայիսի 19-ին և հուլիսի 25-ին՝ եռակողմ արտգործնախարարների հանդիպում:
«Դա տեմպի թուլացու՞մ է: Պետք է ուղիղ նայել ճշմարտության աչքերին… Հնարավոր է, դա գնահատողական դատողություն է, անձնական կարծիք, գուցե՝ էմոցիա, բայց պետք է նայել փաստերին: Տրամաբանությունը լավ հասկանալի չէ. տպավորություն է ստեղծվում, որ մինչև 2022թ. այդ ուղղությամբ ամեն ինչ Հայաստանի ղեկավարության տեսանկյունից հարթ ու անբասիր է եղել»,- ասել է Զախարովան:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
