Լեռնային Ղարաբաղում հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանը քիչ առաջ Կոռնիձորում լրագրողների հետ ճեպազրույցում հերքեց այն տեղեկությունը, որ օգոստոսի 1-ին Աղավնոյի մոտակայքում ձերբակալված Ռաշիդ Բեգլարյանը կապ ունի Արցախ ուղարկվող հումանիտար բեռի կամ նախաձեռնության հետ։ «Այս քայլը նպատակ ունի վարկաբեկել այս բացառապես հումանիտար նախաձեռնությունը։ Դա հերթական սադրանքն է, այդ քաղաքացին որեւէ աղերս չունի հումանիտար բեռի եւ «Սպայկա» ընկերության հետ։ Բեռնատարների 19 վարորդները տեղում են»,-ասաց Վարդան Սարգսյանը։
Հիշեցնենք, որ արդեն 7-րդն օրն է, ինչ Արցախ հումանիտար օգնություն տանող 19 բեռնատարները կանգնած են Կոռնիձորում՝ Հակարիի կամուրջից քիչ վերեւ։ Բեռնատարներում կա շաքարավազ՝ 60 տոննա, ձեթ՝ 40 տոննա, ալյուր՝ 100 տոննա, մակարոնեղեն՝ 80 տոննա, աղ՝ 20 տոննա, կաթի փոշի՝ 40 տոննա, մանկական սնունդ՝ 12 տոննա եւ 9 տոննա դեղորայք։
Ինչ վերաբերում է հումանիտար բեռը տեղ հասցնելուն՝ Վարդան Սարգսյանը նշեց, որ որեւէ առաջխաղացում չկա։ «Միջազգային ճնշում կա Ադրբեջանի վրա, որպեսզի բացեն Լաչինի միջանցքը եւ չխոչընդոտեն հումանիտար բեռի անցումը»,-ասաց Վարդան Սարգսյանը՝ նշելով, որ ռուսական խաղաղապահ զորախմբից դեռ արձագանք չկա։
Կարդացեք նաև
Արմեն ԴԱՎԹՅԱՆ
